O Comité clínico estudará abandonar o certificado covid tras as críticas de hostaleiros e asociacións
A medida, que vence o 26 de febreiro, será posta en cuestión na reunión deste martes xunto cos límites de comensais. Comesaña, que destacou o papel do certificado á hora de incitar á vacinación, mantén agora que se estudará a evolución da pandemia para valorar a súa continuidade.
- Comesaña defende manter o certificado covid polo "papel importante" que xoga na vacinación
- Os hostaleiros rebélanse contra o certificado covid: "non reduce a transmisión do virus"
- O colectivo Berro Seco volve pedir a retirada do pasaporte covid: "é un acoso aos non vacinados"
Por Europa Press / Redacción | SANTIAGO DE COMPOSTELA | 22/02/2022 | Actualizada ás 13:44
O conselleiro de Sanidade, Julio García Comesaña, ratificou este martes que na reunión que manterá esta tarde o comité clínico analizará os "pros e contras" de manter o certificado Covid e a limitación de comensais tanto en interior como exterior de establecementos, as dúas medidas vixentes na actualidade na hostalaría galega no marco da pandemia pola Covid-19.
Así o manifestou a preguntas dos medios Comesaña no marco dunha visita ao Centro de Saúde Illas Canarias en Lugo, onde o titular de Sanidade explicou que a deste martes supón "unha reunión das ordinarias do comité", mentres que o subcomité mantén encontros "todas as semanas".
Comesaña sinalou que na tarde deste martes abordará "a situación actual da pandemia, eses datos de boa evolución, que é máis lenta do que gustaría". "Gustaríanos que fora máis rápido, sobre todo en hospitalizados. Seguimos tendo falecementos e gustaríanos que deixasen de producirse", abundou. Neste contexto, indicou que analizarán a baixada dos casos activos que, valorou, "está a ser importante" e "farase unha revisión das medidas, fundamentalmente no ámbito da hostalaría".
"Revisaranse as restricións actuais, que son soamente dúas: limitación no número de comensais tanto en interior como exterior e a petición do certificado Covid", insistiu, sobre o que matizou que "se revisarán e analizaranse os proles e contras de mantelas". Non apuntou ás máscaras en interiores. No caso concreto do uso do certificado Covid para acceder á hostalaría en Galicia, medida en vigor ata o 26 de febreiro autorizada pola Xunta, o conselleiro de Sanidade aclarou que como "decae a finais de semana", por iso neste comité deben "decidir se se mantén ou non".
