Levan ao xulgado o dono da mina de Touro por "continuas infraccións" na canteira das Somozas

Ecoloxistas en Acción vén de presentar unha denuncia nos Xulgados da Coruña polo "grave impacto ambiental" que, explican, está causando a explotación da canteira propiedade de Francisco Gómez, dono da mina de Touro, nas Somozas.

A organización ecoloxista pide que se depuren responsabilidades penais e alerta dun posible delito contra o medio ambiente e os recursos naturais, así como presuntos delitos de prevaricación, nas "continuadas infraccións cometidas pola empresa mineira". Ecoloxistas en Acción acusa a empresa de "verteduras e arrastres" producidos desde a explotación mineira ata a Zona de Especial Conservación do Río Xuvia, espazo natural integrado na Rede Natura 2000.

Por iso, e ante a "pasividade da administración", Ecoloxistas en Acción denuncia á empresa titular da canteira das Viñas, situada no concello das Somozas, ante o xulgado. O seu responsable é Francisco Gómez, que, segundo explica Ecoloxistas en Acción, está detrás da mineira Explotaciones Gallegas, responsable xunto con Atalaya Mining da mina de Touro.

A organización ecoloxista explica que a canteira se atopa nunha "situación irregular", dado que a concesionaria orixinaria, CUIÑA S.A., nunca comezou a actividade. Neste sentido, a lexislación indica que no momento no que pasan máis de 6 anos sen actividade desde a aprobación da Declaración de Efecto Ambiental (DEA), que data de 1996, esta vira nula. Porén, segundo Exoloxistas en Acción, o xefe de servizo de minas da Xunta na Coruña considera vixente a antiga DEA, de maneira que "exime a nova concesionaria, que adquiriu os dereitos mineiros durante a liquidación concursal, de realizar a necesaria avaliación do impacto ambiental causado pola súa explotación mineira".

A organización ecoloxista alerta tamén que a empresa mineira está "incumprindo" as medidas de seguridade e protección ambiental, posto que "non construíu a balsa de decantación prevista no proxecto, de tal forma que non hai ningún sistema de recollida das augas de escorrentía". Isto provoca, expón a organización, que en días de chuvias os lodos dos residuos mineiros rematen nos regatos próximos que, a súa vez, desembocan no río Xuvia, espazo protexido da Rede Natura 2000.

Ecoloxistas en Acción lembra que esta situación foi denunciada en diversas ocasións pola Asociación de Veciños A Cañota ante Augas de Galicia, a administración de minas e o concello das Somozas. Tamén alcaldes de varios concellos da zona mostraron a súa preocupación pola problemática que supoñen os vertidos da explotación mineira. Con todo, "ata o momento", di a organización ecoloxista, non se realizou actuación ningunha para paliar a situación.

É por iso que, ante o "desleixo da administración galega" na protección ambiental, Ecoloxistas en Acción cursou denuncia por presuntos delitos contra o medio ambiente e os recursos naturais contra a actual empresa explotadora da canteira e de prevaricación ambiental contra o funcionariado que puido "infrinxir a lexislación". Ecoloxistas en Acción denuncia, ademais, o "carácter sistemático" deste tipo de irregularidades nas explotacións mineiras da Coruña e demanda da Xunta que "deixe de ser cómplice".