Sindicatos alertan da baixada de emprego en Galicia e reclaman á Xunta "actuar xa"
Os últimos datos da EPA rexistran un aumento do paro de 6.000 persoas, cun ritmo de avance do 4,4% que crece ao dobre da media española.
Por E.P. | SANTIAGO DE COMPOSTELA | 28/04/2022 | Actualizada ás 14:23
CC.OO. advertiu de que Galicia ten menos emprego que antes da pandemia, mentres reclama que a Xunta ten que "actuar xa" tras os últimos datos da EPA, nos que se rexistra un aumento do desemprego de 6.000 persoas, cun ritmo de avance do 4,4% que crece ao dobre da media española.
Nun comunicado, pon o foco sobre que Galicia ten 5.000 empregos menos que antes da pandemia, cuarto trimestre de 2019, mentres no Estado hai un incremento de postos de traballo de máis de 118.000. Entre os aspectos positivos, valora que a contratación indefinida crece "grazas ao impulso da reforma laboral". Con todo, CC.OO. quéixase de que, "máis dun mes despois", "as medidas anunciadas pola Xunta aínda non se trasladaron ao DOG, nin houbo tampouco medidas para axudar as familias ante a escalada de prezos, só para as empresas".
Pola súa banda, a CIG fai unha valoración negativa dos últimos datos coñecidos cun "forte aumento" da poboación parada, especialmente entre as mulleres. Sinala que hai unha alza das mulleres activas, pois 4.400 deixaron de ser inactivas, nun contexto de "empobrecemento masivo" da clase traballadora pola inflación que "obriga ás familias a buscar máis fontes de ingreso" e declararse como demandantes de emprego.
Igualmente, reponsabiliza ás políticas da Xunta da perda de emprego no sector primario e a industria, á vez que aumenta o emprego precario e as xornadas parciais noutros sectores.
De feito, a CIG sostén que hai un incremento da contratación parcial a consecuencia da non derrogación das anteriores reformas laborais, pois a actual modificación só serve para "enmascarar as estatísticas para presentar unha suposta mellora da contratación indefinida", pero non acaba coa "precariedade".
AUMENTO DE PERSOAS INDEFINIDAS
UGT achaca o incremento do paro a un fenómeno habitual nos primeiros trimestres do ano como consecuencia do fin dos contratos da campaña de Nadal, aínda que valora que se produce un aumento dos contratos indefinidos, 22.800 máis respecto ao anterior trimestre, o que identifica as melloras introducidas pola reforma laboral.
Así, o sindicato considera que "se constatan cambios de tendencia nalgún problema crónicos no mercado laboral ao reducirse a taxa de temporalidade e rotación laboral", "aínda que haberá que esperar algúns meses para poder avaliar e certificar a consolidación destas dinámicas". UGT pide que se siga co despregamento de medidas que axuden a apoiar ao tecido produtivo nun contexto de inflación, á vez que subir as pensións e os soldos conforme ao IPC. Por iso, chama a manifestarse o 1 de maio e reivindicar unha semana laboral de 32 horas.
