Os Premios da Cultura Galega recoñecen o traballo de Zaza Ceballos, Bernardino Graña e Antón Pulido
Tamén foron distinguidos o programa da TVG Dígocho Eu!, o Mosteiro de San Pedro das Rocas, Nova Galega de Danza, Natalia Lamas Vázquez e a Federación de Asociacións Galegas de Arxentina.
Por Europa Press / Redacción | Santiago de Compostela | 07/05/2022 | Actualizada ás 18:14
O Centro Galego de Arte Contemporánea (CGAC) acolleu este sábado a gala dos Premios da Cultura Galega 2021, que foron, entre outros, para o Programa da TVG Dígocho Eu!, a produtora Zaza Ceballos, o poeta Bernardino Graña, o artista Antón Pulido ou o Mosteiro ourensán de San Pedro das Rocas. Entre os asistentes estiveron o presidente da Xunta de Galicia en funcións, Alberto Núñez Feijóo; o conselleiro de Cultura, Román Rodríguez, e o presidente do Parlamento de Galicia, Miguel Ángel Santalices, que entregaron ademais algúns dos galardóns.
Antes de entrar, Feijóo rexeitou facer declaracións e lembrou a importancia dos premios para a cultura e que se trata do seu "último acto como presidente da Xunta de Galicia". Na súa intervención, Núñez Feijóo agradeceu "sinceramente" o seu esforzo ao sector da cultura, "que deu o mellor de si nos momentos máis complexos". O presidente celebrou a "reactivación cultural de Galicia" tras a pandemia e apelou á súa consolidación neste 2022, "co impulso do Xacobeo e os fondos europeos".
"Levades polo mundo o noso nome e enriquecedes a nosa pegada colectiva", referiuse Feijóo respecto ao papel dos creadores, tras o que destacou que "a cultura adoita presentarse como unha continuidade histórica que nos permite adaptar en cada momento o mellor da tradición sen menoscabar a súa esencia, garantindo a súa supervivencia no futuro".
En canto aos galardoados, remarcou o compromiso co idioma de Bernardino Graña e Esther Estévez; a promoción, difusión e proxección internacional da cultura da Federación de Asociacións Galegas da República Arxentina, de Antón Pulido, de Natalia Lamas e da Nova Galega de Danza; o compromiso coa igualdade de Zaza Ceballos ou o labor na conservación do patrimonio do Mosteiro de San Pedro de Rocas.
"Galicia practica unha cultura extrovertida que está en permanente diálogo coas culturas española, europea e americana, aberta a todas as influencias e sen temor a quedar diluída. É o vehículo polo que Galicia ten unha presenza notable no mundo global", continuou Feijóo.
Na categoría de Letras, o galardoado foi Bernardino Graña; en Artes Visuais, Antón Pulido; en Artes Escénicas, Nova Galega de Danza; en Música, Natalia Lamas Vázquez; en Audiovisual, Zaza Ceballos; en Lingua, o programa da TVG Dígocho Eu!; en Patrimonio Cultural, o Mosteiro de San Pedro de Rocas; e en Proxección Exterior, a Federación de Asociacións Galegas Rep. Arxentina.
