A Xunta defende "dilixencia" nun caso de acoso laboral que tardou en resolver dous anos
O PSdeG censura a "errática política de persoal" da Consellería de Medio Rural.
Por Europa Press / Redacción | SANTIAGO DE COMPOSTELA | 13/05/2022 | Actualizada ás 14:04
O secretario xeral técnico da Consellería de Medio Rural, Nicolás Vázquez, defendeu a "dilixencia" na actuación da Xunta, que tomou as "medidas oportunas", a pesar de ser condenada polo Tribunal Superior de Xustiza de Galicia (TSXG) a indemnizar un xefe de brigada forestal por tardar dous anos en resolver un caso de acoso laboral que sufriu por parte doutros dous traballadores.
Na comisión de Agricultura, a deputada socialista Carmen Rodríguez Dacosta preguntou por esta sentenza publicada por Praza.gal, que entroncou outros fallos recentes contra a Xunta por vulneración de dereitos laborais, polo que censura a "errática política de persoal" da Consellería de Medio Rural.
Sobre este fallo, Rodríguez Dacosta lamentou que o afectado trasladou a súa problemática en 2013, pero, a pesar das "reiteradas denuncias del e doutros traballadores contra a actitude violenta dos implicados", a Xunta tardou dous anos en resolver a situación, o que cualifica de "desidia" e "abandono de funcións ante esta situación tan grave".
En resposta, o secretario xeral técnico de Medio Rural lembrou que, aínda que o TSXG condenou agora á Xunta, en primeira instancia un xulgado de Lugo sostivo que a demanda "carecía de fundamento" porque estaba acreditado que a Xunta "si tomase medidas".
RELATO DOS FEITOS
No relato dos feitos realizado polo alto cargo da Xunta, apúntase que as primeiras queixas chegaron en "abril-maio" de 2013 polo comportamento de dous traballadores contra o demandante. Eses dous empregados foron "citados inmediatamente" e en xuño citouse ao afectado.
Asegura que se tomaron medidas "de forma inmediata" cunha adaptación do posto de traballo e modificación das quendas para que este persoal coincidise "o menos posible". De feito, expón que entre outubro de 2013 e xullo de 2014 o afectado non coincidiu con eses dous traballadores ao haber cambios de centros e polos meses sen traballar debido á categoría de fixos descontinuos.
Con todo, en setembro de 2014 constátase a persistencia da problemática e incóase un expediente disciplinario, que é "farrogoso e laborioso". Apunta que foron 15 os empregados públicos que traballaron nese informe.
Finalmente, resolveuse o expediente en abril de 2015 cunha imposición de sanción de emprego e soldo por unha falta grave e outra moi grave. Por todo iso, Nicolás Vázquez esgrime a "dilixencia" na actuación da Xunta ao tomar diferentes medidas "provisionais" co respecto aos tempos do procedemento e a presunción de inocencia.
Ademais, o secretario xeral técnico expón que, aínda que o protocolo antiacoso non foi aprobado ata 2016, previamente existía outro protocolo que recollía os seus "principios xerais".
