O festival Go!Go!Zo! volve ao Monte do Gozo con dous certames de rock e folk como novidades

O festival Go!Go!Zo! Xacobeo 21-22 volve ao Monte do Gozo de Santiago de Compostela desde o 15 de xuño, na súa segunda edición, na que a principal novidade será a celebración de dous certames para grupos noveis de rock e folk.

O evento contará este ano co certame XeneraSon Rock, aberto a agrupacións noveis pertencentes a academias de música (ou nos seus primeiros pasos na carreira musical), tanto de Galicia como de Portugal, e que se celebrará en xullo.

Así, as semifinais serán entre o 1 e o 3 de xullo, e a final terá lugar o 30 de xullo. Un xurado profesional valorará as actuacións e, do seis bandas finalistas, premiarase a dúas, que poderán gravar un LP nun estudo profesional e actuar no Festival Revenidas e nos Atardeceres non Gaiás.

Para participar neste concurso hai que inscribirse (ata o 15 de xuño) na sección de reservas da web www.gogozo.gal, e o prezo por persoa inscrita é de 25 euros. As bandas que se anoten deberán achegar nome, número de integrantes e os instrumentos que tocan, para poder facilitar os cambios de escenario.

Por outra banda, en agosto, terá lugar o certame XeneraSon Folk, destinado a agrupacións de música e baile tradicional de Galicia. As inscricións tamén están abertas a través da web, e as semifinais celebraranse do 12 ao 14 de agosto, mentres que a final terá lugar o 20 de agosto.

O xurado estará formado por tres persoas destacadas ligadas ao folk e á música tradicional galega e, na súa valoración, terá en conta a execución, dificultade e vestiario das agrupacións. Os dous grupos vencedores obterán un premio en metálico e a oportunidade de actuar nun programa de televisión.

CAMPAMENTOS FORMATIVOS

A segunda edición de Go!Go!Zo! Xacobeo 21-22 contará tamén cunha sección específica dedicada á formación, con tres campamentos formativos sobre diferentes aspectos: produción musical (no mes de xullo), produción audiovisual (en setembro) e 'webcomic' (en setembro).

Os campamentos desenvolveranse ao longo de cinco días e permitirán aos participantes adquirir as competencias precisas para realizar unha sesión musical, crear unha peza audiovisual ou publicar o seu propio cómic 'en liña'.

As novidades do festival complementaranse cunha ampla programación estival, con sesións musicais nas que participarán unha ducia de DJ, actividades para nenos (con inchables e xogos acuáticos) e unha sección especial para amantes da música 'reggae'. Así, o ciclo Gozo Station achegará ao público ás orixes da cultura xamaicana con Soundsystem.

Non faltarán macroactuacións de rock e folk, exhibicións de 'masterclass' de 'zumba', veladas de combos musicais e outras actividades.