Aprobado o plan de conservación do monumento natural Fraga de Catasós

O Consello da Xunta aprobou este xoves de forma definitiva o Plan de conservación do monumento natural Fraga de Catasós, en Lalín, un bosque mixto singular cunha superficie de 4,52 hectáreas e que alberga exemplares de castiñeiro centenarios considerados os mellores de Europa polo seu porte forestal.

Cunha vixencia indefinida, segundo apuntou a Xunta, o plan ten como obxectivo protexer esta formación boscosa a través da identificación dos valores que hai que preservar e dos posibles riscos que poidan afectalos, así como dunha serie de normas de aproveitamento de chan e dos recursos naturais e doutras relativas ao uso público e ás actividades científico-educativas que poida acoller.

No documento fíxase unha ducia de obxectivos para a preservación e xestión sustentable deste espazo e 21 medidas coas que garantir a súa consecución, que contará cun investimento por parte da Xunta de máis de 250.000 euros durante a próxima década.

As metas que se perseguen con este plan divídense en catro grupos: obxectivos relacionados coa conservación da formación singular, da biodiversidade e da paisaxe, aos que se reservará un total de 51.500 euros; obxectivos de uso e aproveitamentos, cun investimento de 25.000 euros; obxectivos relacionados co uso público do espazo natural, 52.000 euros; e obxectivos no ámbito da investigación, educación e participación cidadá, cunha partida prevista de 22.000 euros.