Os xurados elixen os finalistas dos Premios Xerais 2022

A primeira reunión dos xurados dos Premios Xerais 2022 tivo lugar este venres para seleccionar as obras finalistas. O vindeiro venres, 15 de xullo, terá lugar o segundo encontro, do que sairán as obras vencedoras da edición. Cada un dos premios está dotado con 10.000 euros.

O xurado da XXXIX edición do Premio Xerais de Novela formado por Carolina Sertal (xornalista), Mónica Cores (profesora e bookstagramer), Sara Carballa (coordinadora do club de lectura Daquelas que len), Begoña Varela Bárcena (libreira), Pepe Pintado (científico do Instituto de Investigacións Mariñas do CSIC) e Xosé Manuel Moo Pedrosa (secretario do xurado), en representación de Xerais, con voz e sen voto, acordou declarar como finalistas as obras presentadas baixo as lemas Aniversario, Culpables e Pilarteiros. Nesta categoría concorreron 40 obras.

Pola súa banda, o xurado da XIV edición do Premio Jules Verne de Literatura Xuvenil, formado por Gabri Fuentes (xornalista), Araceli Collado Díaz (bookstagramer), Adrián Gómez Ramos (escritor), Manuel Moledo (biólogo e escritor), María Asunción Carballo Rodríguez (profesora e coordinadora de biblioteca e Ramón Domínguez Veiga (secretario do xurado) en representación de Xerais, declararon finalistas os orixinais coas lemas Armeses, Epicuro e O xogo de Casandra. Nesta categoría concorreron 23 obras.

Finalmente, o xurado da XXXVII edición do Premio Merlín de Literatura Infantil, formado por Iván Davila (actor e narrador oral), Chus Gómez Dorrego (xornalista), Tamara Lema (mestra e autora de material educativo) María Montes (ilustradora), Elisa Nieves Barreiro (bookstagramer) e Anaír Rodríguez (secretaria do xurado), en representación de Xerais, con voz e sen voto, acordou que as obras finalistas desta edición son: Amorodo, Comando G e Equinoccio. Nesta categoría presentáronse 24 orixinais.

Premios Xerais | Fonte: Edicións Xerais de Galicia.