Ecoloxistas denuncian o "gasto de millóns de litros de auga" das industrias cárnica e láctea

Ecoloxistas denunciaron o gasto de recursos hídricos das industrias de carne e de leite e criticaron que ese consumo non se teña en conta na campaña de sensibilización da Xunta de Galicia. Segundo explica a Fundación Franz Weber nun comunicado, a agricultura é responsable do consumo mundial da 70% da auga e cada quilogramo de carne de vacún supón un gasto hídrico de 15.000 litros.

Fanse eco da advertencia publicada pola Organización das Nacións Unidas para a Alimentación e a Agricultura (FAO), "que vén realizando desde hai case dúas décadas sen atopar apenas resposta das administracións públicas".

"Se en 2020 se sacrificaron en Galicia case 400.000 animais de diferentes especies cun destino principal de aproveitamento cárnico, o consumo de auga foi enorme, polo que lanzamos unha necesaria reflexión sobre o modelo alimentario da comunidade e o impacto das decisións diarias sobre o planeta, expondo ademais a posibilidade de reconverter o sector gandeiro cara a outros modelos", comentan no comunicado.

A este respecto, a ONG lembrou o contexto de presequía, con medidas de restrición de uso de auga en actividades de lecer ou mesmo facilitando este recurso en camións cisterna ante a baixada continuada do caudal dos encoros e ríos.

Así, lamentan que ningunha das recomendacións sobre consumo racional de auga se basee nos hábitos alimentarios, a pesar de que eses 15.000 litros por quilo de carne "equivalen a nada menos que 75 duchas estándar, que a OMS cuantifica en 10 minutos". "A comparativa co leite supón que por cada litro de produto resultante supuxo o gasto previo de 1.000 litros de auga", continúan.

Insisten en que a transición proteica e o consumo responsable de recursos como a auga non pode basearse unicamente na acción particular de cada familia, "xa que isto evita a toma de responsabilidade da Xunta de Galicia como parte do problema". "Se a gandaría 'bebe' millóns de litros de auga doce cada ano resulta surrealista que se dedique unha importante parte dos fondos propios e axudas europeas a financiar unha industria que contribúe ao quecemento do planeta", censuran.

A este respecto, lembra a organización que a propia FAO estima que o 14,5% das emisións de gases de efecto invernadoiro provén deste sector, "pero é imposible atopar unha soa campaña ou medida do executivo autonómico que visibilice este impacto na Natureza".

Leite, vacas. | Fonte: Xunta de Galicia.