Oliver Laxe reúne nos Ancares a 16 creadores para asesoralos coas súas obras cinematográficas
Forma parte da iniciativa "Proxectos creativos eseciais"
Por E.P. | SANTIAGO DE COMPOSTELA | 03/09/2022 | Actualizada ás 16:46
O cineasta Oliver Laxe reúne estes días nos Ancares a 16 creadores multidisciplinares para participar na primeira edición das residencias de desenvolvemento de proxectos cinematográficos, 'Proxectos creativos esenciais'.
A iniciativa, que conta co apoio da Xunta de Galicia, reúne a creadores de diferentes puntos de Galicia e España, así como de Bélxica, Cuba e Venezuela. Organizada pola Asociación Ser, celébrase ata o 10 de setembro na aldea de Vilela, en Navia de Suarna, e busca "asesorar aos participantes no proceso de posta en marcha das súas respectivas obras cinematográficas, á vez que se lles dá a oportunidade de establecer sinerxías cos procesos do resto de participantes".
O encontro ten lugar ademais na Casa de Quindós, antigo fogar familiar do propio Laxe e sede da Asociación. O "retiro de traballo" formúlase como un laboratorio creativo, conducido polo propio Laxe, "ao redor das intuicións, intencións, ideas e pulsións que cada participante quere filmar".
Durante as xornadas abordaranse tamén diferentes aspectos do proceso cinematográfico, desde a escritura do guión, a posta en escena e a xestión interpretativa do elenco, pasando pola produción ou o financiamento. O programa inclúe tamén sesións de meditación e ioga, proxeccións de cinema e outra serie de actividades lúdicas e de conexión coas tradicións e traballos do rural.
