Eliminado un punto de vertedura de augas residuais na praia de Porto, en Carnota
A orixe estaba nunha rede de pluviais que desaguaba no mar neste areal a través dunha tubaxe de formigón.
Por E.P. | SANTIAGO DE COMPOSTELA | 04/09/2022 | Actualizada ás 13:56
A Consellería de Infraestruturas e Mobilidade comunicou que, a través de Augas de Galicia, eliminou un punto de vertedura de augas residuais na praia de Porto, no concello coruñés de Carnota.
Segundo trasladou a Xunta, os técnicos do Plan de Control de Verteduras detectaron o foco no marco duns traballos rutineiros que desenvolvían no municipio para o control e seguimento dos puntos de vertedura existentes. Deste xeito, os técnicos da administración autonómica identificaron a orixe nunha rede de pluviais que desaguaba no mar neste areal a través dunha tubaxe de formigón.
Ante a deficiencia observada, os técnicos requiriron ao ente municipal a execución das actuacións oportunas para eliminar a contaminación detectada. Así, nunha nova inspección na zona, o persoal dependente de Augas de Galicia corroborou a eliminación da vertedura tras a execución de obras na rede de saneamento existente no lugar e, por tanto, o cesamento da contaminación.
