O exalcalde de Ribadumia Nené Barral sentará no banco dos acusados dúas décadas despois da súa detención
A detención produciuse por un alixo de máis de 400.000 paquetes de tabaco e está acusado de formar parte dunha organización que introducía tabaco de forma ilegal en España.
Por Europa Press / Redacción | SANTIAGO DE COMPOSTELA | 30/09/2022 | Actualizada ás 18:22
O exalcalde de Ribadumia, José Ramón 'Nené' Barral, sentouse este venres no banco dos acusados da Sección cuarta da Audiencia Provincial de Pontevedra para responder á acusación que formula o fiscal contra el e pola que pide que sexa condenado a 10 anos de cárcere e o pago de 15 millóns de euros de multa.
A vista prodúcese 21 anos despois da súa detención por un alixo de 432.000 paquetes de tabaco. Agora, Barral está acusado xunto a outras doce persoas por integrar, segundo Fiscalía, unha organización que introducía tabaco de forma ilegal en España.
O Ministerio Público considera a Barral o líder dunha organización integrada por persoas de nacionalidade portuguesa, holandesa, suíza, croata, norteamericana, inglesa e polaca que entre 1996 e 2001 introduciu en España e no territorio da Unión Europea importantes partidas de tabaco de procedencia extracomunitaria.
A primeira sesión do xuízo centrouse nas cuestións previas presentadas polos avogados, pero a vista oral non empezará ata o próximo día 15 de decembro, data sinalada polo tribunal para poder estudar todas as peticións formuladas. Neste sentido, a avogada de 'Nené' Barral, Carmen Ventoso, alegou "incompetencia de xurisdición" ao considerar que o caso debería ser xulgado pola Audiencia Nacional.
Tamén rexeitou que o seu cliente cometese un delito de contrabando ou de suborno, pois o catro colectores de tabaco incautados non chegaron a saír da Zona Franca do porto de Vigo, zona exenta nas leis contra o contrabando e cando aínda había posibilidade de declarar a mercadoría. Ademais, apuntou que os delitos estarían xa prescritos pois "estamos en 2022 e estes feitos ocorreron en 1999".
Os letrados que exercen a defensa do resto de acusados adheríronse a estas cuestións sumando tamén peticións de nulidade das actuacións, argumentando que foi unha investigación "prospectiva" con escoitas a máis de cen teléfonos dun setenta persoas por espazo de dous anos, autorizadas polo xulgado de instrución número 1 de Vilagarcía, que entón dirixía o xuíz José Antonio Vázquez Taín.
Os avogados defensores dos axentes de Vixilancia Aduaneira e da Garda Civil acusados nesta causa tamén argumentaron que estes feitos non poden ser xulgados por "causa xulgada", porque xa se lles xulgou e absolveu no Tribunal Supremo polo mesmo delito.
O fiscal nega tal circunstancia, pois a causa á que se refiren era por tráfico de haxix e, aínda que serían os mesmos autores, serían distintos feitos. Así as cousas, o fiscal xefe, Juan Carlos Aladro, rexeitou todos estes argumentos e solicitou a celebración do xuízo.
