A AIReF considera "factibles" as previsións macroeconómicas presentadas por Galicia para 2023
A institución fai notar que estas previsións se realizan nun contexto de incerteza no que a materialización dalgúns riscos están a impactar nas perspectivas económicas tanto europeas como españolas.
Por E.P. | SANTIAGO DE COMPOSTELA | 13/10/2022 | Actualizada ás 17:42
A Autoridade Independente de Responsabilidade Fiscal (AIReF) avala e considera "factibles" as previsións para 2023 presentadas por Galicia, xa que se sitúan dentro da pinza de estimacións do consenso de analistas e é inferior á contemplada no cadro macroeconómico que acompaña aos Orzamentos Xerais do Estado.
A institución fai notar que estas previsións se realizan nun contexto de incerteza no que a materialización dalgúns riscos identificados por AIReF desde finais de 2021 e, especialmente en 2022, están a impactar nas perspectivas económicas tanto europeas como españolas. Estes riscos céntranse ao redor da crise enerxética, a persistencia da inflación e o endurecemento das condicións de financiamento.
Segundo o escenario macroeconómico de Galicia, o Produto Interior Bruto (PIB) podería crecer un 3,6% en 2022, aínda que a AIReF considera que este escenario "pode resultar optimista". Para o ano 2023, Galicia estima un crecemento do PIB de volume do 1,7%, uns datos que a AIReF sinala que non concordan coa información máis actualizada para o conxunto nacional froito das últimas revisións estatísticas realizadas polo Instituto Nacional de Estatística (INE) para os anos 2019 a 2021, publicadas o 15 de setembro de 2022.
A taxa de variación do PIB galego prevista pola AIReF é do 0,6%, menor que a contemplada de Galicia, pero dentro da pinza de estimacións do consenso de analistas. Ademais, a estimación do crecemento do PIB a prezos correntes da Comunidade, un 5% en 2023, resulta idéntica ao estimado pola AIReF.
De forma adicional, Galicia incorpora os resultados de simulacións do impacto do Plan de Recuperación, Transformación e Resiliencia (PRTR) sobre a economía galega. O impacto potencial do PRTR estimado cífrase en 0,7 puntos porcentuais en 2022, en 0,9 puntos porcentuais en 2023 e superior a 0,7 en anos posteriores.
