Detido por tráfico de heroína un veciño de Marín con antecedentes policiais

A Policía Nacional detivo un home de 51 anos de idade, veciño de Marín con antecedentes policiais previos, como presunto responsable dun delito contra a saúde pública por traficar con heroína.

A intervención, levada a cabo por parte de axentes policiais do Grupo Operativo Local da Policía Nacional de Marín, tivo lugar na tarde do pasado xoves día 6 de outubro. Segundo explica o corpo, o home desprazábase por pistas e camiños da zona rural da localidade para levar a cabo a distribución entre os seus 'clientes'.

Desde había algún tempo, recibíanse na Comisaría informacións respecto da actividade ilícita deste individuo, cuxa actividade xeraba "inseguridade". A fase de investigación, que se prolongou durante máis dun mes, estableceu "múltiples dispositivos de vixilancia" sobre a actividade e os movementos desta persoa para comprobar a veracidade destas informacións.

En base ás indagacións, os axentes procederon a detelo nun dispositivo de vixilancia nas inmediacións do domicilio do investigado, no rural de Marín. O home saíu da súa casa a pé e con actitude vixiante, transitando por camiños entre zona arboredo cara ao centro do concello.

Os axentes, tras interceptalo e efectuar un cacheo superficial, localizaron un envoltorio plástico cunha "cantidade reseñable" de heroína en roca que podería dar para unhas 80 doses, segundo estimacións da Policía. Por todo iso, foi detido como presunto autor dun delito de tráfico de drogas.