O temporal non dá tregua, polo que se manterá a alerta amarela por fortes ventos e choivas os próximos días
Tras os centenares de incidencias rexistrados o fin de semana a causa do paso da borrasca 'Béatrice', seguiron rexistrándose problemas puntuais na Comunidade, aínda que en menor medida
Por Europa Press / Redacción | SANTIAGO DE COMPOSTELA | 25/10/2022 | Actualizada ás 17:55
O temporal non dá tregua en Galicia, que manterá nos próximos días a alerta amarela en distintas zonas do seu territorio debido a choivas fortes e ventos con refachos de máis de 80 quilómetros por horas.
Tras os centenares de incidencias rexistrados o fin de semana a causa do paso da borrasca 'Béatrice', seguiron rexistrándose problemas puntuais na Comunidade, aínda que en menor medida --por exemplo, o corte da Avenida de Oza, na Coruña, tras a caída dunha árbore--.
No seu resumo de valores extremos, ademais, Meteogalicia concretou que en dúas estacións da provincia de Lugo rexistráronse ventos que superan o 100 km/h. É o caso de Penedo do Galo, en Viveiro, que ás 13,40 horas medía ventos de 104,1 km/h e da Pontenova, onde se rexistraban refachos de 102,6 km/h ás 13,00 horas.
En Punta Candieira, Cedeira (A Coruña), ás 15,00 horas, alcanzáronse refachos de 93,8 quilómetros por hora. En canto ás choivas, a estación de Fornelos de Montes, en Pontevedra, chegou a medir 35,3 l/m2.
AVISO PARA MÉRCORES E XOVES
Meteogalicia mantén aviso amarelo para varias zonas da Comunidade este mércores. En concreto, no Suroeste e o Oeste da provincia da Coruña, a partir das 18,00 horas, espéranse choivas localmente moi fortes, acumulando máis de 40 l/m2.
Outras zonas da Comunidade, como A Mariña, a Montaña de Ourense e a de Lugo veranse afectadas en diferentes franxas horarias por ventos con refachos de máis de 80 km/h. Tamén haberá fortes ventos no mar nas Rías Baixas e Costa da Morte.
O xoves entre as 0,00 e as 3,00 horas o Suroeste e o Oeste da Coruña estarán igualmente en alerta amarela por choivas fortes; mentres outras aprtes do territorio, tamén na Coruña, así como a montaña ourensá e a de Lugo, e A Mariña, veranse afectadas por ventos fortes. As zonas de Rías Baixas e Costa da Morte rexistrarán refachos fortes no mar.
