Mato aborda co presidente de Navantia a carga de traballo e a construción do novo taller de sub bloques
Outro dos asuntos abordado foi a incorporación de Navantia aos proxectos de hidróxeno verde, que a curto prazo vai afectar moi positivamente a outra das instalacións do estaleiro de Ferrol
Por E.P. | SANTIAGO DE COMPOSTELA | 03/11/2022 | Actualizada ás 17:28
O alcalde de Ferrol, Angel Mato (PSOE), reuniuse na sede de Madrid da empresa naval pública Navantia co presidente desta compañía, Ricardo Domínguez, para abordar os proxectos que ten en marcha en Ferrol a Sociedade Estatal de Participacións Industriais (SEPI) e as perspectivas de futuro dos dous estaleiros da ría.
Entre outros asuntos, abordaron o inicio da construción do novo taller de sub bloques, "prevista para fin de ano ou principios do próximo", segundo asegurou o rexedor, e para o que os Orzamentos Xerais do Estado (PGE) do 2023 inclúen unha partida de 56 millóns de euros, unha cifra que representa máis da metade do investimento total prevista, cuantificada en 100 millóns de euros.
A través dun comunicado, tamén explicaron que se abordaron as posibilidades que se abren para a área de Reparacións, que vén de completar o maior contrato da súa historia, o de extensión da vida útil da plataforma canadense FPSO 'Terra Novap, con picos de actividade nos que participaron preto dun milleiro de traballadores. "Este contrato abre un nicho de mercado moi importante e a previsión de conseguir outros similares", indicou Matogueira.
Outro dos asuntos abordado foi a incorporación de Navantia aos proxectos de hidróxeno verde, que a curto prazo vai afectar moi positivamente a outra das instalacións do estaleiro de Ferrol, como é a Fábrica de Turbinas, na que se vai a pór en marcha unha liña de fabricación de electrolizadores "da man de compañías de referencia", mentres que no ámbito da eólica mariña, trasladou o rexedor ferrolán, "a aposta de Navantia por este sector, a través de Seanergies, tomando un papel activo no desenvolvemento das renovables".
RENOVACIÓN DAS FRAGATAS F-100
Por outra banda, Mato e Domínguez abordaron a repercusión que terá a modernización das actuais fragatas F-100 sobre a actividade do estaleiro, unha vez que o Ministerio de Defensa anunciara que ese programa se vai a desenvolver nas instalacións de Ferrol durante o próximos dez anos, cun investimento de 2.000 máis para a renovación das F-100, que nos orzamentos de 2023 xa contan cunha partida superior aos 100 millóns.
