Premio Nobel de Química 2019: "As baterías do futuro permitirían a un automóbil percorrer máis dun millón de kilómetros"
O premio Nobel de Química en 2019, M. Stanley Whittingham, explicou que "o futuro a medio e longo prazo é das baterías de ións de litio" e que o obxectivo é que este tipo de almacenamento de enerxía "tome a substitución dos combustibles fósiles, fundamentalmente nos medios de transporte"
Por Europa Press / Redacción | SANTIAGO DE COMPOSTELA | 16/11/2022 | Actualizada ás 17:58
O premio Nobel de Química en 2019, M. Stanley Whittingham, explicou este mércores, durante o seu relatorio en Santiago de Compostela, que "o futuro a medio e longo prazo é das baterías de ións de litio" e que o obxectivo é que este tipo de almacenamento de enerxía "tome a substitución dos combustibles fósiles, fundamentalmente nos medios de transporte".
M. Stanley Whittingham, que impartiu a conferencia de apertura do XXVI Encontro Galego Portugués de Química, explicou que o seu equipo está a potenciar que as baterías de ións de litio "duren moitísimo tempo" e que mesmo "poderían chegar a ser permanentes e que non fixese falta ter que recargalas".
Así mesmo, o científico británico e investigador da Universidade Estatal de Nova York explicou que isto dependerá do que a sociedade "queira pagar por ter esta tecnoloxía á súa disposición", xa que estas baterías "serían moi caras".
Nesta liña, segundo sinalou o Colexio de Químicos de Galicia nun comunicado, o Nobel de Química 2019 detallou que estas "baterías do futuro" permitirían a un automóbil "percorrer máis dun millón de kilómetros". Así, destacou que serían unha fonte de subministración enerxética "moi importante" e que "unha soa recarga permitiría circular toda a vida dun coche".
Este congreso, que se celebra na facultade de Química da Universidade de Santiago de Compostela, reúne desde este mércores e ata o venres, 500 congresistas que darán máis de 550 relatorios relacionados coa química.
