Os nenos menores de 5 anos poderán vacinarse contra a gripe o sábado en todos os hospitais galegos
Tras o "éxito" da experiencia piloto efectuada o pasado fin de semana no Hospital Clínico de Santiago, optouse por ampliar o plan
Por Europa Press / Redacción | SANTIAGO DE COMPOSTELA | 23/11/2022 | Actualizada ás 11:51
O presidente da Xunta, Alfonso Rueda, ratificou na sesión de control do Parlamento que o Servizo Galego de Saúde (Sergas) ofrecerá o sábado aos pais e nais de menores 5 anos a posibilidade de vacinalos contra a gripe en todos os hospitais galegos (incluídos os comarcais). Na área sanitaria da Coruña-Cee, inmunizarase tamén o domingo.
O lugar e o momento de vacinación será trasladado por SMS aos pais, nais ou titores das nenas e nenos que formen parte da poboación diana este mesmo xoves. En concreto, as citas para vacinarse daranse no conxunto das áreas sanitarias para o sábado 26 en horario de 10.00 horas a 14.30 horas; e de 15.30 a 20.00 horas. Para o domingo 27 en A Coruña-Cee manterase o mesmo horario.
Así o trasladou o presidente en resposta ao portavoz parlamentario do PSdeG, Luís Álvarez, nunha pregunta centrada na xestión dos servizos públicos en Galicia. O socialista advertira de que aos populares "vailles no ADN" non preservar "os servizos públicos". "Cando o PP entra pola porta, os servizos públicos saltan pola xanela", apostilou.
Rueda contraatacou cunha dura crítica ao Goberno central pola subida prevista da peaxe da AP-9 e insistiu en que a Xunta, coa mesma concesionaria, tira de orzamentos autonómicos para frear a alza nas autoestradas de titularidade galega. E como exemplo de "como se blindan" os servizos públicos na comunidade tamén aludiu á vacinación.
Entre outras cuestións, contou que Galicia se dotou do calendario de vacinación infantil "máis potente de España", tras o reforzo que supuxo asumir o custo das doses para inmunizarse fronte ao papiloma humano ou a meninxite B. Pero nun contexto marcado polo aumento das infeccións respiratorias con especial intensidade na poboación en idade pediátrica, tamén aludiu á gripe.
Así, anunciou que, tras o "éxito" da experiencia piloto efectuada o pasado fin de semana no Hospital Clínico de Santiago, optouse por ampliar o plan e facilitar que o sábado os proxenitores poidan levar aos nenos e nenas de entre seis meses e 5 anos aos hospitais galegos para seguir avanzando na vacinación.
532 NENOS E NENAS PARTICIPARON NA PROBA PILOTO
E a continuación, ratificou que, tras o "éxito" da experiencia piloto efectuada o pasado fin de semana no Hospital Clínico de Santiago, óptase por ampliar o plan e facilitar que o sábado os proxenitores poidan levar aos nenos e nenas de entre seis e 59 meses aos hospitais galegos para seguir avanzando na vacinación.
No que respecta á experiencia piloto, a Xunta informou de que participaron un total de 532 menores de cinco anos. Segundo se informou previamente, o Sergas enviou 3.293 mensaxes de citación, polo que participarían da chamada 'masiva' en torno ao 16 % dos citados.
Pero nun contexto marcado pola alza de infeccións respiratorias (que tamén impiden vacinarse se están en curso, por exemplo), o Executivo constata bos resultados tendo en conta que a cobertura da gripe entre a poboación pediátrica da área sanitaria de Santiago (algo máis de 11.000 menores) incrementouse ata en cinco puntos, pasando dun 36 % a un 41 %.
"FALTA DE COMPROMISO"
Durante o debate, o portavoz parlamentario do PSdeG, Luís Álvarez, lamentou a "falta de compromiso" da Xunta e incidiu en que Galicia é "a segunda autonomía que menos inviste en Atención Primaria", ten "10.000 solicitudes de Dependencia sen valorar" e "deixa sen executar 400 millóns en vivenda pública".
En clave sanitaria, profundou na falta de pediatras ou nos puntos de atención continuada (PAC) sen médico, e as críticas recibidas dende os colectivos médicos. "Estamos a pagar todos os recortes da pasada década sobre os que viñamos advertindo", proclamou, antes de ironizar con que, "tras a errada viaxe ao centro e á moderación", os populares revélanse como "herdeiros de (José María) Aznar", que "dicía que 'é caro iso da dependencia'".
Así, recalcou que aos populares vailles "no ADN" non preservar os servizos públicos. "Cando o PP entra pola porta, os servizos públicos saltan pola xanela", esgrimiu, ao que Rueda replicou que "moi frouxo" se tivo que ver o socialista no debate cando "tivo que sacar a Aznar a pasear".
