Día "histórico" no aeroporto de Santiago: chega a pasaxeira 3 millóns, unha viguesa que viña de Tenerife
Por Europa Press / Redacción | SANTIAGO DE COMPOSTELA | 30/11/2022 | Actualizada ás 18:07
O aeroporto de Santiago de Compostela-Rosalía de Castro recibiu este mércores á pasaxeira tres millóns, a viguesa María Jesús Lemos, que procedía de Tenerife e chegou nun voo da compañía Ryanair.
Neste contexto, a usuaria desembarcou de última, ao redor das 14.30 horas e contou coa recepción do director do aeroporto de Santiago-Rosalía de Castro, Marcos Díaz; a country manager de Ryanair para España e Portugal, Elena Cabrera; o concelleiro de Turismo e Relacións Institucionais, Gumersindo Guinarte; e a directora xerente de Turismo de Santiago, Flavia Ramil.
A pasaxeira 3 millóns foi agasallada cunha bolsa de agasallos do Concello en colaboración con Aena, ademais dun cartón canxeable na aerolínea que lle entregou o director do Aeroporto á súa chegada. María Jesús Lemos, viaxeira habitual da compañía, afirmou que a noticia, dada en pleno voo, foi unha "sorpresa moi grande".
"FEITO HISTÓRICO"
O director do aeroporto de Santiago, Marcos Díaz, resaltou que é un día de celebración e un "feito histórico" tras uns anos "complicados" debido á pandemia. Ademais, agradeceu a María Jesús, en representación de todos os pasaxeiros, pola súa confianza e seguir apostando por Santiago para coller os voos.
Nesta liña, o concelleiro, Gumersindo Guinarte expresou a vontade de que o aeroporto siga crecendo e estes números pronto queden atrás. Igualmente, resaltou a importancia de manter este inverno a "práctica totalidade" das conexións internacionais.
Por outra banda, a empresa Aena informou de que nesta tempada de inverno, que abarca ata o 25 de marzo, o aeroporto dispón de 40 rutas directas, 23 nacionais e 17 internacionais. Durante estes meses, as compañías aéreas programaron 15.346 voos nos que ofrecerán máis de 2,8 millóns de asentos en cinco meses.
