Mineiros galegos alertan que se non reciben axudas ao prezo do gasoil "haberá graves consecuencias"

A Xunta Directiva da Cámara Oficial Mineira de Galicia (COMG), constituída polas diferentes industrias que conforman o aproveitamento dos recursos minerais, lamentan que o Goberno central "suprimise a bonificación ao prezo do gasoil para o sector extractivo".

"O sector mineiro é moi sensible á subida do prezo do gasoil xa que sofre, en primeiro termo e con efecto multiplicador, calquera variación no prezo dos produtos de extracción e produción", sinala nun comunicado.

Os representantes da minaría galega alertan das dificultades que están a atravesar "moitos centros produtivos debido ao aumento do prezo dos carburantes". "Esta inflación afecta as operacións de todo o ciclo mineiro: desde a investigación á restauración, pasando polo aproveitamento do recurso mineiro".

Por outra banda, afirma que a minaría é "un sector estratéxico, do que depende o 70% da actividade industrial europea". "Por iso, a súa falta de viabilidade económica podería comprometer por completo a cadea de valor".

Juan José López, presidente da COMG, alerta das "graves consecuencias que podería ter a dilación desta situación". "Os sobrecustos fan insustentable a actividade a curto prazo e, con iso, o mantemento de tecido produtivo e de emprego".

Gasolineira, gasoil, IPC, prezos, consumo, petróleo, carburante