A fenda salarial en Galicia: as mulleres galegas perciben un salario medio semellante ao que tiñan os homes hai 13 anos
A fenda salarial das empregadas galegas é de case 5.000 euros ao ano, sendo as segundas que menos cobran por hora en España. O 40,5 % das asalariadas cobra o SMI ou menos.
Por Europa Press / Redacción | SANTIAGO | 17/02/2025 | Actualizada ás 14:03
As traballadoras galegas sofren unha fenda salarial do 17,7 % respecto dos homes, o que se traduce en 4.714 euros menos ao ano, segundo o informe que acaba de publicar UGT Galicia. Con motivo do Día internacional da igualdade salarial, que se celebra o 22 de febreiro, UGT realiza este estudo no que se recolle que as mulleres galegas son as segundas pola cola en retribución por hora, con só 14,37 euros, só por enriba de Murcia (13,98 euros). Están a dous euros da media de 16,30 euros, lonxe dos 19,8 euros en País Vasco.
O salario medio é de 21.912,75 euros ao ano para as mulleres galegas, un 10 % menos que a media estatal do 24.39,82 euros. Neste caso Galicia está na metade da táboa de comunidades. Esta situación arroxa o dato de que as mulleres galegas perciben un salario medio semellante ao que tiñan os homes hai 13 anos. A fenda é mesmo maior nas mulleres do sector privado ao elevarse ao 26 %. No caso das pensións de xubilación atópase no 34,2 %.
O 40 % COBRA O SMI OU MENOS
O 40,5 % das mulleres asalariadas teñen ingresos iguais ou menores que o salario mínimo, un dato que só se anota o 27,9 % dos homes. As grandes empresas son as que menos fenda salarial teñen en Galicia (un 14,75 %), mentres que esta taxa elévase ata o 23 % nas empresas de menos de 200 traballadores. A maior fenda salarial nas sete cidades prodúcese en Ferrol (15,5 %), seguida da Coruña (15,1 %); Santiago (12,4 %); Vigo (10,9 %); Ourense (6,3 %); Lugo (5,4 %); e Pontevedra, coa menor cifra, do 5 %.
Entre os aspectos positivos, UGT apunta que a fenda do 17,7 % (con datos do Instituto Nacional de Estatística de 2022, últimos actualizados) supón un recorte fronte ao 21,7 % que había en 2018, pero cun ritmo de descenso aínda insuficiente, aínda que prevén futuros avances pola alza do salario mínimo. "Nestes anos están a lograrse progresos, pero a desigualdade é evidente que aínda persiste", conclúe.
