A patronal galega critica as "barreiras administrativas" dos últimos anos, cunha potencia "testemuñal" en Galicia
Envía unha carta ao Goberno para pedir que amplíe o prazo para a tramitación de proxectos
Por Europa Press / Redacción | SANTIAGO DE COMPOSTELA | 02/02/2023 | Actualizada ás 16:36
A Asociación Eólica de Galicia (EGA) enviou unha carta ao Goberno na que pide que amplíe o prazo para a tramitación de proxectos en relación cos fitos a cumprir en próximos meses para a súa posta en marcha.
Os proxectos que contaron cunha Declaración de Impacto Ambiental (DIA) favorable --77 de tramitación da Xunta e sete do Goberno en Galicia-- contan agora cun prazo de tres meses para ter unha autorización administrativa previa e de seis meses para a luz verde para a construción.
No escrito, dirixido a Rede Eléctrica --participada pola Sociedade Estatal de Participacións Industriais (SEPI)--, a patronal eólica galega empraza a que os trámites se poidan unificar con data de resolución no maior prazo posible, é dicir, en seis meses.
A EGA defende que se debe optar pola "interpretación máis favorable ao dereito dos administrados, debe tomarse o prazo máis longo como garantía dos intereses xerais e particulares".
Así, expón que se opte por "o principio de interpretación máis favorable ao dereito dos administrados e o non aproveitamento por parte da Administración dunha situación xerada pola mesma para prexuízo ao cidadán, por ser contrario á doutrina de actos propios".
"Por iso, debe entenderse que esta situación foi xerada unicamente pola actuación administrativa e, pola inexistencia de previsión sobre a tramitación conxunta, polo que, as súas consecuencias non poden repercutir en prexuízo do interesado", razoa.
E é que a patronal galega critica as "barreiras administrativas" sufridas polo sector nos últimos anos, cunha potencia "testemuñal" posta en servizo en Galicia nos dous últimos anos, xa que supón só 68 megawatts de 3.000 megawatts en España.
En Galicia, unha vintena de proxectos dos 140 sobre os que a Xunta debía resolver informe ambiental o pasado 25 de xaneiro perderon o seu permiso de conexión ao non contar cunha DIA en prazo. O Goberno galego aprobou a declaración ambiental de 77 proxectos que contan 2.200 megawatts, mentres que o Executivo central autorizou sete DIA --para parques de Alcoa e Showa Denko-- para 656 megawatts.
