Enagás construirá o hidroducto Guitiriz-Zamora que segundo a Xuna evitará deixar Galicia como "unha illa enerxética"
Enagás e Reganosa asinaron un acordo polo que Enagás adquiría a rede de 130 quilómetros de gasodutos de Reganosa mentres que Reganosa compraba un 25% da Planta de Regasificación do Musel, en Xixón.
Por E.P. | SANTIAGO DE COMPOSTELA | 04/03/2023 | Actualizada ás 13:11
A compañía Enagás ratificou este sábado o seu compromiso co proxecto do hidroducto entre Guitiriz e Zamora, que asume como propio na súa Rede Troncal e que evitará que Galicia quede como "unha illa enerxética". Así llo confirmou o CEO de Enagás, Arturo Gonzalo, ao presidente da Xunta, Alfonso Rueda, nunha reunión que mantiveron este sábado na sede da Xunta en San Caetano.
En rolda de prensa, o representante da compañía detallou que Enagás "asume como propio" este proxecto, que fora impulsado por Reganosa --da que a Xunta é accionista--. "Asumimos a responsabilidade e o compromiso de seguir tramitando ese proxecto ata a súa incorporación á lista de proxectos de común interese da Unión Europea", aseverou.
Esta semana, Enagás e Reganosa asinaron un acordo polo que Enagás adquiría a rede de 130 quilómetros de gasodutos de Reganosa por un importe de 54 millóns de euros, mentres que Reganosa compraba un 25% da Planta de Regasificación do Musel, en Xixón, por un importe de 95 millóns de euros.
Segundo este acordo, Enagás queda coa rede de transporte que ata agora era propiedade de Reganosa, integrada por 130 quilómetros de gasodutos de 80 bares de presión e Reganosa entra cun 25% no accionariado da planta xixonesa, que ata agora era propiedade 100% de Enagás.
OPERATIVO EN 2030
Tras este acordo, o CEO de Enagás comprometeuse este sábado co Goberno galego a facer "todo o necesario" para que este proxecto avance, co obxectivo de que o hidroducto estea incluído nesa lista de proxectos europeos de interese común e iniciar a súa construción a finais do ano 2025 ou principios de 2026 e, deste xeito, que estea operativo en 2030.
Segundo Alfonso Rueda, era "fundamental" ter asegurada a interconexión de Galicia coa Rede Xeral en España e co resto de Europa. "Saben os problemas iniciais de que Galicia quedase convertida nunha illa enerxética e isto supuña un inconveniente moi grande", expresou.
Por iso, Rueda agradeceu a Enagás que "coa súa potencia e compromiso" asuma este proxecto como "unha das súas tarefas principais". Do mesmo xeito, sinalou a importancia de que se inclúa a construción dese hidroducto para "atopar o financiamiento europeo suficiente".
