A Xunta formaliza a súa terceira emisión de débeda sustentable por un importe de 500 millóns

A Xunta formalizou a súa terceira emisión de débeda sustentable por importe de 500 millóns de euros, cunha demanda de investidores, tanto domésticos como internacionais, superior ao triplo da emisión, o que pon de manifesto, reivindica, a confianza dos investidores na economía e nas finanzas de Galicia.

De acordo co xa avanzado en días pasados, o Diario Oficial de Galicia publica este martes as condicións financeiras desta nova emisión de bonos da Xunta a un prazo de 6,5 anos. A emisión está prevista no programa anual de endebedamento da Comunidade Autónoma e non supón un incremento da cifra neta de endebedamento, xa que coincide coa amortización doutros créditos xa existentes.

Estas obrigacións, incluídas no Marco de Financiamento Sustentable da Xunta de Galicia, estarán integramente orientadas aos investimentos sociais e medio ambientais, á economía verde e sustentable e vinculados tamén á Axenda 2030. En concreto, serán empregadas en proxectos relacionados co uso verde dos recursos como as enerxías renovables, a eficiencia enerxética, a prevención e o control da contaminación, a conservación da biodiversidade, o transporte limpo ou a xestión sustentable da auga e dos recursos naturais.

Ademais, a estes recursos tamén se lles poderá dar un uso social a través de proxectos relacionados con infraestruturas básicas --como a mellora de camiños rurais ou banda ancha no rural--, o acceso a servizos esenciais (apoio á educación infantil, primaria e secundaria ou á construción de hospitais), vivenda asumible (axudas ao aluguer para grupos vulnerables), ou coa xeración de emprego (apoio ao emprego nas áreas rurais).

Na distribución xeográfica sobresae a participación de investidores estranxeiros con máis do 50%, entre os que destaca Italia cun 23%, seguido de Portugal cun 9% da emisión. Por tipo de investidor destaca a demanda inscrita polos bancos, seguidos polas xestoras de fondos, aseguradoras e fondos de pensións.

RUEDA DESTACA O "ÉXITO" DESTA EMISIÓN COMO MOSTRA DE CONFIANZA

Este mesmo martes, nun acto en Madrid, o presidente da Xunta, Alfonso Rueda, destacou como "mostra da confianza que inspira Galicia" que se culminou " con éxito" esta emisión. A demanda triplicou o importe que se ofrecía e permitiu lograr unhas condicións financeiras "moi favorables", recalcou, en comparación con outras comunidades.

O presidente destacou que a xustificación diso atópase na xestión "responsable": "Somos o territorio que menos aumentou o volume da débeda desde o inicio da crise económica, a única autonomía de réxime común que non foi rescatada e unha das comunidades con maior esfuerzoi nversor de toda España".

O presidente da Xunta, Alfonso Rueda, dirixe a reunión do Consello.. XUNTA