Premios da Deputación da Coruña para entidades sociais que traballan a favor da inclusión social

A Deputación da Coruña entregou este xoves o II Premios de Boas Prácticas en Servizos Sociais a entidades da provincia que destacaron polo seu traballo a favor da inclusión social e a protección dos colectivos máis vulnerables. A gala de entrega dos premios, que tivo lugar no IES Rosalía Mera da Coruña, acolleu a representantes das numerosas entidades da provincia que optaban a estes premios.

En total, estaban representadas máis de medio centenar de asociacións que levan a cabo actividades relacionadas coa atención á infancia e a mocidade, persoas con diversidade funcional, maiores, inmigración, apoio a persoas con trastornos adictivos ou persoas en risco de exclusión social.

O II Premios de Boas Prácticas recaeron na Asociación Down Coruña; a Asociación Down Teima de Ferrol; a Asociación de Pais de Persoas con Trastorno de Espectro Autista (Aspanaes) da provincia da Coruña e a Asociación Ambar de Barbanza, pola súa traxectoria exemplar de apoio ás persoas con diversidade funcional desta comarca.

Os galardóns completáronse con dúas mencións honoríficas para a Asociación a prol de Persoas con Discapacidade Intelectual de Galicia (Aspronaga) e para Asociación Integro de Persoas con Diversidade Funcional da Comarca de Bergantiños, Terra de Soneira e Fisterra. No acto, o presidente da Deputación, Valentín González Formoso, lembrou a importancia e o papel decisivo que teñen estas entidades na sociedade e agradeceu o seu traballo diario.

Noutra orde de cousas, a institución provincial informou que a campaña 'É por ser muller" terá este venres, nas instalacións da Agrupación Alexandre Bóveda da Coruña, a primeira cita da súa programación. Neste mes de marzo, continuará nos concellos de Cabanas, Carballo, Betanzos e Cambre. Mentres que en abril chegará a Arzúa, Oroso e Zas.

O presidente da Deputación da Coruña, Valentín González Formoso. DEPUTACIÓN DA CORUÑA