A Xunta espera ter "nuns meses" a súa lei do litoral e insta ao Goberno a "entrar en razón"
Rueda apunta que é "compatible" que coexistan ecosistemas de vida mariños e empresas
Por Europa Press / Redacción | Galicia | 10/03/2023 | Actualizada ás 12:24
A Xunta espera ter "nuns meses" a futura Lei de Ordenación do Litoral, "antes de que termine este semestre", segundo precisou o presidente autonómico, Alfonso Rueda, nunha xornada de presentación da mesma.
Tanto nese acto como en posteriores declaracións, incidiu en que o Executivo galego está a facer "o que lle permite a lei". Por iso, instou ao Goberno central a "entrar en razón" e "non chegar ao recurso", sinalou sobre a posibilidade exposta desde o mesmo.
Nun acto xunto ás conselleiras de Medio Ambiente e do Mar, Ángeles Vázquez e Rosa Quintana, respectivamente, lembrou que, unha vez redactada, aprobarase como proxecto de lei e levará ao Parlamento galego.
Rueda incidiu en que o obxectivo da mesma é "protexer intereses", dixo en alusión aos quilómetros de costa cos que conta Galicia e a actividade que nela se asenta, así como os concellos costeiros. "Galicia é costa, debe protexer ese litoral", engadiu o titular do Executivo galego, para quen é "compatible" que coexistan ecosistemas de vida mariños e empresas.
"REALIDADES DISTINTAS"
Ademais, asegurou que non é posible "admitir" que se diga que "a 600 quilómetros coñécese mellor" o litoral galego. "Non é o mesmo Canarias ou o Levante, son realidades distintas", apostilou.
Por outra banda, aseverou, en alusión ás edificacións que están no litoral, tamén as indutriais, ou as empresas situadas nel, que desde Galicia hai "o dereito" e a "obrigación" de "ordenalo".
