Un xulgado de Ferrol arquiva a querela polo asasinato de Moncho Reboiras por prescrición do delito
A xuiza apunta que a imprescriptibilidade dos delitos de lesa humanidade e xenocidio foi introducida no ordenamento xurídico español "en data moi posterior" ao crime
Por Europa Press / Redacción | SANTIAGO DE COMPOSTELA | 11/04/2023 | Actualizada ás 15:17
O xulgado de Instrución número 1 de Ferrol decretou o sobresemento da querela presentada polos familiares de Moncho Reboiras contra 24 membros das forzas policiais franquistas que participaron no dispositivo no que morreu a tiros o militante nacionalista o 11 de agosto de 1975.
Nun auto datado a 3 de abril ao que tivo acceso Europa Press este martes, a titular do xulgado de instrución ferrolán decreta o arquivo da denuncia por prescrición do delito de lesa humanidade en concurso cun delito de asasinato, que foi formulada o pasado mes de febreiro por Manuel Reboiras Noya, irmán do histórico dirixente da Unión do Povo Galego (UPG) morto a mans da policía franquista cando tiña 25 anos.
Na súa resolución, contra a que cabe recurso de reforma e apelación, a maxistrada Ana González Lorenzo apóiase nunha serie de sentenzas de distintos organismos xudiciais para concluír que está extinguida a responsabilidade penal dos autores da morte de Reboiras ao estar prescrita, algo que, para esta xuíza, non modifica a nova Lei de Memoria Democrática en vigor desde outubro de 2022, meses antes da presentación da querela.
Así, apunta que a imprescriptibilidade dos delitos de lesa humanidade e xenocidio foi introducida no ordenamento xurídico español "en data moi posterior" ao crime de Reboiras, momento no que "non existía ningún precepto legal que acordase ou recoñecese a natureza prescriptible dos mesmos".
A xuíza lembra que España non ratificou a convención de Nacións Unidas que 1968 declarou imprescriptibles os crimes de guerra e de lesa humanidade, polo que este texto internacional "non pode ser aplibcable" no Estado, onde, por tanto, só poden ser perseguidos delitos dese tipo que fosen cometidos a partir do 1 de outubro de 2004.
Tamén sinala que sobre a morte de Moncho Reboiras a mans da policía pesa a aplicación da Lei de Aministía aprobada dous anos despois do crime, en 1977. Por iso, lembra que o Supremo determinou que os tratados interancionales "non prevén" a posibilidade de que unha lei sexa declarada nula por un xuíz, quen "están suxeitos ao principio de legalidade e, por tanto, non poden en ningún caso derrogar leis", algo que corresponde en "exclusiva" ao lexislador.
"Non pode esquecerse neste sentido que en 2011 o Congreso dos Deputados rexeitou a proposición exposta poara modificar a Lei de Amnistía", subliñou na súa resolución a maxistrada Ana González, que tamén determina que a nova Lei de Memoria Democrática, en vigor desde o outono de 2022 tampouco ampara legalmente que poidan ser perseguidos delitos de lesa humanidade cometidos antes do 1 de outubro de 2004.
AMNISTÍA INTERNACIONAL
Nun comunicado, Ceaqua Galiza avanza a presentación dun recurso contra esta resolución que, ao seu xuízo, evidencia a necesidade de modificar a Lei de Amnistía de 1977, adaptar o Código Penal ao dereito internacional e que sexa ratificada a convención de 1968 sobre a imprescriptibilidade dos crimes de guerra e de lesa humanidade.
"Estas iniciativas lexislativas resultan imprescindibles para reverter o modelo de impunidade no Estado español que se mantén actualmente", incide esta plataforma nun comunicado no que subliñan que a Lei de Memoria Democrática non afecta as cuestións sobre as que se basea a argumentación do xulgado ferrolán.
Por tanto, apelou ao Goberno e grupos parlamentarios para que "adopten unha posición firme e decidida que recoñeza sen ambaxes o dereito á tutela xudicial efectiva na orde xurisdicional penal a todas aquelas persoas e os seus familiares que sufriron graves violacións punibles de dereitos humanos durante a ditadura e a Transición".
Así mesmo, tamén demandou ao poder xudicial que "acomede" as súas resolucións "ás esixencias derivadas da aplicación do Dereito Internacional dos Dereitos Humanos, tal e como se lle vén esixindo desde hai moitos anos desde instancias internacionais tan sumamente relevantes como o Consello de Dereitos Humanos das Nacións Unidas".
