Un xurado aprecia lexítima defensa no veciño de Cabana de Bergantiños acusado de matar ao seu cuñado
No seu veredicto consideraron que houbo delito de lesións e non de homicidio ou asasinato.
Por Europa Press / Redacción | SANTIAGO DE COMPOSTELA | 25/05/2023 | Actualizada ás 22:10
O xurado considerou non culpable dos delitos de homicidio imprudente e de asasinato ao octoxenario acusado de matar o seu cuñado, de 85 anos, no domicilio de Cabana de Bergantiños onde convivían xunto á muller da vítima e irmá do procesado.
Así se deu a coñecer ao facerse público o seu veredicto, segundo informou o Tribunal Superior de Xustiza de Galicia (TSXG). En concreto, o xurado declarouno culpable dun delito de lesións, pero apreciou a concorrencia da eximente completa de lexítima defensa. O maxistrado presidente indicou que, como consecuencia do veredicto, a sentenza será absolutoria.
Na lectura das conclusións, Fiscalía rebaixou de dez a seis anos a petición de condena para o acusado de matar o seu cuñado, en xuño de 2019 en Cabana de Bergantiños, tras golpearlle cunha barra de ferro na cabeza cando o falecido o ameazou cunha escopeta.
No xuízo celebrado na Audiencia Provincial da Coruña, o Ministerio Público mantivo a petición de condena por un delito de homicidio e expuxo a eximente de lexítima defensa e a agravante de parentesco.
A acusación particular, pola súa banda, retirou a petición de delito de asasinato con ensañamento porque os golpes non foron "a causa da morte", como expuxeron os forenses nunha das sesións do xuízo, e mantivo a cualificación de asasinato con aleivosía polo que pedía 25 anos de cárcere e, en última instancia, o delito de homicidio, cunha pena neste caso de 15 anos.
En contraposición, a defensa mantivo a súa petición inicial de consideración dos feitos como constitutivos dun delito de lesións ou homicidio preterintencional, coas eximentes completas de lexítima defensa e medo insuperable e a atenuante de confesión polo que pedía a libre absolución.
