O sector turístico "esperanzado" co verán, cunha ocupación hoteleira con picos do 80%
Asociacións de hostalaría prevén un "bo verán" pero piden melloras na mobilidade, especialmente en avión e tren
Por Europa Press / Redacción | SANTIAGO DE COMPOSTELA | 01/07/2023 | Actualizada ás 11:18
O sector turístico de Galicia móstrase contento e esperanzado polo verán que, aínda que meteorolóxicamente xa iniciado, arrincará para o sector esta semana. Apuntan que as previsións son "moi boas", cunha ocupación que roldará o 60% en xullo, con picos do 80%, pero tamén recelan de como afectarán os problemas de mobilidade ao turismo.
Respecto de 2022, explica o presidente do Clúster de Turismo de Galicia, Cesáreo Pardal, a Europa Press, o número de turistas incrementouse nun 15% respecto de 2022 e, "aínda que en xuño houbo un pequeno baixón, todo fai indicar que en xullo volverá subir a ocupación".
Un especial impacto, avanza, notarase en áreas como a do Salnés, Mariña lucense e Ribeira Sacra, "onde este ano o Clúster prevé un crecemento notable". Aínda que a ocupación media moverase en torno ao 55% e o 60%, chegará ao 80% en determinados momentos --como a ponte festiva de Santiago-- e mesmo "haberá establecementos que colguen o cartel de completo".
Vaticina Pardal unha redución no número de pasas a noite, pero un incremento no gasto. Ademais, celebra que se recupere por fin o turismo internacional, "moi afectado os últimos dous anos pola Covid".
Na mesma liña expresouse o presidente de Hostalaría Compostela, Thor Rodríguez, que augura "un moi bo verán, cunha moi boa ocupación hoteleira". "Empezamos moi forte xa en Semana Santa, que foi de record. Xa tivemos un maio e un xuño moi positivos", comenta.
Para o mes de xullo, ademais da ponte do 25 de xullo, Rodríguez destaca o concerto o próximo día 8 de Robbie Williams. "Este tipo de eventos musicais, como o Son do Camiño, moven moitísimo diñeiro", sinalou en conversación con Europa Press, avanzando tamén que en agosto haberá hoteis co cartel de completo. "Temos que seguir facendo de Santiago o que xa é, un referente, un destino moi apetecible á hora de planificar as vacacións", defendeu.
PREOCUPADOS POLOS PROBLEMAS DE MOBILIDADE
A pesar das boas perspectivas, o sector recoñece tamén algunhas debilidades que piden solucionar. Entre elas, a "descoordinación aeroportuaria" de Galicia. "É un fracaso estrepitoso dos políticos. Menos mal que nos chegan moitos turistas internacionais do Porto, cada vez visítannos máis portugueses. A pesar disto o turismo non deixa de crecer", comenta Pardal.
Á situación aeroportuaria, o presidente do Clúster suma as "insuficientes" frecuencias de AVE e o atraso na chegada dos trens Avril. "Seguimos esperando para que chegue a outras cidades galegas. Isto fainos xogar en clara desvantaxe con outras cidades", lamenta.
A cara positiva desta situación é o traballo que levan a cabo desde a entidade en favor do Clúster Transfronteirizo Galiza Norte de Portugal, "unha ferramenta que hai que impulsar de aquí a 10 anos".
"EQUILIBRIO SOCIAL" NO TURISMO
Pardal recoñece estar "moi preocupado" pola mobilidade, do mesmo xeito que Thor Rodríguez. Este último pon como exemplo o turismo de congresos, que en 2022 tivo un gran protagonismo na capital de Galicia e que evidenciou un problema no sector do taxi.
"Faltan taxis e un bus directo ao aeroporto --un servizo que agora está a facer o urbano--. O que non é cómodo non o é só para os visitantes, tampouco o é para os composteláns", argumenta o representante da hostalaría compostelá.
Thor Rodríguez insiste en que a hostalaría depende de "moitísimos factores", non só dos peregrinos e os turistas, "tamén dos congresos, os estudantes ou os propios veciños". "E as complicacións en mobilidade non axudan", apunta.
Por outra banda, e no que respecta á capital de Galicia, Rodríguez mostrouse a favor de repensar a organización do turismo que chega a Santiago. "O turismo en Santiago debe ser reordenado. O aumento das cifras ten que ir acompañado dun equilibrio social para a comodidade dos veciños, o que nos preocupa moito", afirma.
Rodríguez recoñece ter xa un primeiro contacto coa nova alcaldesa de Santiago, a nacionalista Goretti Sanmartín, que no seu discurso de investidura tamén avogou por unha reordenación do turismo.
