CC.OO. mostra a súa "preocupación" polas resolucións xudiciais contra proxectos eólicos e o impacto no emprego
Así o manifesta o sindicato días despois de que a Confederación de Empresarios de Galicia (CEG) falase de "perdas millonarias" que supón a "desautorización xudicial" de informes ambientais destes proxectos.
Por E.P. | SANTIAGO DE COMPOSTELA | 13/07/2023 | Actualizada ás 20:26
CCOO-Industria de Galicia expresa a súa "máxima preocupación" ante recentes resolucións xudiciais do Tribunal Superior de Xustiza de Galicia (TSXG) que paralizan a construción de parques eólicos, porque afectan á creación de emprego e "dificultan a saída do tradicional atraso económico e industrial" que sofre a Comunidade.
Así o manifesta o sindicato nuns comunicado días despois de que a propia Confederación de Empresarios de Galicia (CEG) advertise das "perdas millonarias e do prexuízo" supón a "desautorización xudicial" de informes ambientais destes proxectos.
Agora, CCOO lamenta o impacto económico que poden ter estes fallos xudiciais, que supoñen "unha agresión contra os intereses da inmensa maioría da clase traballadora galega". Ademais, atribúenas a xuíces "moi próximos ás asociacións demandantes".
Estes maxistrados, denuncia o sindicato, están a tomar o camiño de "pór en dúbida o criterio de funcionarios públicos independentes" e "dando prioridade a informes facilitados por asociacións demandantes, elaborados con dubidosa calidade científico-técnica e aínda máis dubidosa neutralidade".
CCOO menciona proxectos de industrias electrointensivas, como o de Sentury Tire de fábrica de pneumáticos nas Pontes (A Coruña) e a planta de fibras téxtiles de Altri en Palas de Rei, que están "en perigo por culpa da irresponsabilidade" destes colectivos que priorizan os "intereses políticos dos seus líderes" sobre "problemas reais" de Galicia, como o cambio climático e o benestar da clase traballadora.
Neste contexto, a central esixe ás administracións públicas que "tomen cartas neste asunto" e regule "de forma clara e firme" as concesións de permisos aos proxectos eólicos, para darlles "seguridade xurídica".
Sobre este tema manifestouse hai uns días a Asociación Xuízas e Xuíces para a Democracia Galicia, para defender "a independencia xudicial e a dignidade de todos os seus membros", mentres que tamén o TSXG tivo que emitir un comunicado da súa sala de goberno neste sentido.
A CIG IMPUGNA UN DECRETO
Por outra banda, a CIG anunciou que impugnará o decreto autonómico que regula entidades de colaboración ambiental e crea o rexistro de entidades e o banco de persoas expertas en avaliación ambiental, porque busca "substituír o traballo do persoal funcionario público" co obxectivo de "facilitar a autorización de proxectos con impacto ambiental" como os eólicos.
Con esta ferramenta, ao amparo da lei galega de simplificación administrativa, a CIG denuncia que a Xunta "botará man de empresas privadas colaboradoras" e dunha bolsa de expertos "contratados directamente para facilitar as autorizacións" e "legalizar así a venda dos recursos naturais" de Galicia.
