Pontón apela a concentrar o voto no BNG para ter escano en Lugo e Ourense
Mara Lois, de Sumar, di que "as mulleres xogámonos todo o 23 de xullo".
Por Europa Press / Redacción | OURENSE | 20/07/2023 | Actualizada ás 14:56
A portavoz nacional do BNG, Ana Pontón, apelou este xoves a "encher as urnas" o domingo de papeletas desta formación para lograr un escano por Lugo e por Ourense "á conta do PP".
"Acabo de estar en Lugo co próximo deputado por esa provincia, Dani Castro, e agora estou en Ourense coa próxima deputada por esta provincia, Noa Presas", dixo a portavoz nacional. A súa presenza en ambos os lugares, ratificou, busca "deixar ben claro" que este 23J "o BNG vai a por todas e quere facer historia conseguindo que, por primeira vez, Lugo e Ourense teñan unha representación coas mans libres para acabar coa discriminación das forzas estatais e defender á Galicia interior en Madrid", dixo.
SUMAR
Por outra banda, acabeza de lista de Sumar ao Congreso pola provincia da Coruña, Marta Lois, asegurou que un goberno central do líder popular, Alberto Núñez Feijóo, co candidato de Vox, Santiago Abascal, como vicepresidente, suporía a "destrución e aniquilación" dos dereitos das mulleres e fixo un chamamento a "todos os galegos e galegas progresistas para que vaian votar" este domingo.
"As mulleres xogámonos todo o 23 de xullo", recalcou a candidata ao Congreso da formación impulsada pola vicepresidenta do Goberno, Yolanda Díaz, tras pedir o voto para Sumar co obxectivo de conseguir "políticas que sigan conquistando dereitos e liberdades".
Fíxoo durante unha repartición electoral no barrio coruñés das Conchiñas, no que estivo acompañada polo número dous da candidatura, Manuel Lago, e no que se mostrou "convencida" de que destas eleccións xerais sairá "un goberno progresista cun Sumar forte".
