Betanzos reclama unha inspección urxente no río Mendo tras detectarse norovirus nas súas augas
O concello está á espera dos resultados analíticos das mostras tomadas este pasado xoves 20 de xullo, en oito puntos e que determinarán o seguinte paso a dar na subministración de auga.
Por E.P. | SANTIAGO DE COMPOSTELA | 21/07/2023 | Actualizada ás 19:17
A alcaldesa de Betanzos, María Barral, pediu este venres que Augas de Galicia realice, con urxencia, unha inspección, "palmo a palmo", do río Mendo, augas arriba da captación que ten o municipio para saber o punto "no que supostamente se produce unha vertedura con presenza de norovirus".
A primeira edil require a Augas de Galicia "este esforzo, como organismo responsable de eliminar e vixiar verteduras nos ríos, tendo en conta a posibilidade de que esta nova presenza de norovirus estea localizada no río, igual que na anterior ocasión".
María Barral, que pedirá a colaboración do Seprona para que realice labores similares na conca do Mendo, explicou tamén que o Xulgado de Betanzos admitiu a trámite a denuncia presentada polo concello sobre a vertedura que se produciu o pasado día 13 de xuño e que detectou a empresa concesionaria.
"Como dixemos no seu momento, queremos chegar ata o final e esperemos que a Xustiza poña os medios necesarios para dar coa orixe desa vertedura do día 13, documentado polos nosos servizos xurídicos e técnicos", sinala nun comunicado.
Por outra banda, o concello está á espera dos resultados analíticos das mostras tomadas este pasado xoves 20 de xullo en oito puntos e que determinarán o seguinte paso a dar na subministración de auga. "En función do que determine Sanidade, o Concello decretará se hai ou non restricións no consumo de auga".
Ata ese momento, e como medida preventiva, tras a reunión mantida o xoves con Augas de Galicia e Sanidade, o consistorio mantén un chamamento á poboación para que evite a inxesta de auga, na medida do posible durante as próximas horas.
