O BNG urxe a "garantir os dereitos da poboación máis vulnerable"
Pon o foco nas familias monoparentais, a mocidade ou a poboación migrante
Por E.P. | Compostela | 01/08/2023 | Actualizada ás 14:42
A deputada do BNG Olalla Rodil rexistrou no Parlamento de Galicia unha serie de iniciativas nas que urxe ao Goberno galego a modificar a lei de inclusión, do ano 2013, para adaptala á nova realidade socioeconómica galega e "atender ás necesidades da poboación máis vulnerable", especialmente no que respecta ás familias monoparentais, a mocidade ou a poboación migrante.
Segundo a memoria anual do Consello Económico e Social (CES) referida a a situación socioeconómica de Galicia, a taxa de risco de pobreza e exclusión social descendeu no último ano ata situarse no 18,4%. Con todo, advirte Rodil, non o fai en todas as franxas de idade, nacionalidade nin tipoloxía de fogares.
Así, a poboación entre 16 e 24 anos é a que rexistra unha maior incidencia, de forma que o 25,6% da poboación galega nesta franxa de idade está en risco de pobreza ou exclusión social. Entre os menores de 16 anos, a taxa é do 22,7%; e para as persoas de 50 a 64 anos sitúase no 22,7%.
A portavoz do BNG en materia de dereitos sociais subliña, ademais, que o maior risco de pobreza, segundo a última memoria do CES, continúa rexistrándose nos fogares compostos por unha persoa adulta con menores a cargo (50,6%), aínda que se ve reducida.
REFORMA PENDENTE
Nesta conxuntura, o BNG censura que o Executivo galego siga sen reformar a lei de inclusión "para adaptar a realidade normativa e socioeconómica actual" e urxe establecer novas ferramentas que permitan atender ás necesidades da poboación, fundamentalmente das familias monoparentais, os mozos e a poboación migrante.
"O PP prometeu e comprometeu por activa e por pasiva a reforma da lei, que leva anos anunciando. Non só incumpriu as súas promesas, senón que votou reiteradamente en contra das propostas impulsadas polo BNG", lamentou.
