O PSdeG acusa á Xunta de "afogar" aos concellos polo canon da auga e non descarta a vía xudicial

O secretario de Organización do PSdeG, José Manuel Lage, lanzou un "ultimato" á Xunta para que se reúna de forma urxente cos municipios para abordar a "tropelía" do canon da auga que "afoga" aos concellos, no que supón unha "última chamada" ao diálogo para buscar unha solución antes de optar pola "confrontación", "sen descartar que se chegue a unha vía de carácter xudicial".

Nunha comparecencia co secretario de Política Municipal do PSdeG e presidente da Federación Galega de Municipios e Provincias (Fegamp), Alberto Varela, así como acompañado de varios alcaldes, Lage Tuñas denunciou que o presidente da Xunta, Alfonso Rueda, "afoga concellos e sobe impostos a veciños" con este canon.

Respecto diso, Alberto Varela alerta de que municipios que teñen uns 7 millóns de orzamento están a recibir liquidacións de 200.000 euros por un cuadrimestre, o que é "inasumible". Censura que esta situación se debe a que o PP sacou adiante a lei do ciclo da auga "con présa" e "sen consenso de concellos".

Así mesmo, quéixase de que esta é unha "pinga máis" mentres os concellos teñen que facerse cargo de competencias "impropias" sen recibir financiamento, tales como o servizo de axuda no fogar (SAF), as escolas infantís e os servizos de drogodependencia, entre outros. Avisa de que son novas obrigacións que "están a afogar" as arcas municipais.

ALFONSO RUEDA E ETHEL VÁZQUEZ, "SEÑORES FEUDAIS"

Nesta liña, Lage Tuñas incide en que o "afogamento" aos municipios tradúcese en "unha subida de impostos para todos os veciños" e "sen diálogo de ningún tipo" cos concellos, no que  cualifica de "fuxida cara a adiante" por parte de Rueda cun "canon á choiva".

O secretario de Organización dos socialistas galegos arremete contra a "discrecionalidade e arbitrariedade" do Goberno galego, que "deixa a máis de 100 concellos" sen financiamento para mellora de depuradoras, así como para cumprir co mandato da UE, e sen aplicar fondos europeos que se transfiren á comunidade, pois "só miran a cor política" na repartición.

A XUNTA PIDE AO PSDEG QUE "DEIXE DE ENREDAR"

Pola súa banda, e en resposta ás declaracións de Lage, a conselleira de Infraestruturas, Ethel Vázquez, pediu ao PSdeG que "deixe de enredar" porque a lei do ciclo integral "non crea ningunha taxa nova aos seus usuarios nin sobe o recibo de auga", polo que empraza aos socialistas a que "se informen ben sobre as competencias e responsabilidades municipais".

En declaracións este martes, a conselleira lamenta que "o PSOE esquecera o que son as competencias e responsabilidades municipais na xestión da auga e confunda subir impostos con mellorar a xestión e o servizo da auga".

ETHEL VÁZQUEZ AFIRMA QUE QUEN EMITE OS RECIBOS DA AUGA É O CONCELLO

A conselleira sostén que "quen emite os recibos da auga son os concellos, quen decide o ciclo integral da auga son os municipios, en consecuencia, pois deciden o recibo". Apunta a "moitos exemplos" de municipios socialistas de subida de recibo da auga de forma previa á entrada en vigor desta lei, entre os que citou ao Grove, Viveiro e Vigo, "que é o municipio con recibo de auga máis alto" e que "subiu desde o ano 2020 un 15 %".

Ethel Vázquez incide que "son os municipios os que voluntariamente deciden o modelo de xestión", "son os que deciden e emiten o recibo de auga". Aquí, opina que "o que afecta moitísimo o recibo da auga é o prezo da luz", "por tanto, consecuencia das políticas do Goberno socialista de España".

Así, acusa ao PSdeG de que "teñen un erro grave, de vulto, de concepto, porque quen decide o modelo de xestión de augas e quen emite o recibe da auga son os concellos". Reitera que a lei "ofrece axuda" aos municipios para infraestruturas e "axudas para investimentos".