Un protocolo unilateral? Xunta e deputacións acordan seguir coas negociacións sobre os consorcios de bombeiros entre críticas de sindicatos
O protocolo compromete a conversión a persoal fixo e iniciar en setembro a negociación de novos convenios para homoxeneizar condicións, que entrarían en vigor en outubro de 2024.
Por Europa Press / Redacción | SANTIAGO | 02/08/2023 | Actualizada ás 18:29
Xunta e deputacións asinaron este mércores un protocolo no que acordan continuar coas negociacións sobre os consorcios de parques comarcais do servizo contraincendios. Os bombeiros comarcais comezaron o pasado 15 de xuño unha folga indefinida para reclamar que se cumpra unha sentenza do Tribunal Supremo do ano pasado para a conversión a persoal laboral fixo dos efectivos, á vez que demandan un convenio autonómico coas mesmas condicións para os traballadores, unido á mellora de medios e aumento de persoal.
Nun comunicado, o Goberno galego sostén que "as forzas sindicais representativas dos traballadores dos parques de bombeiros comarcais, que mantiveron reunións con representantes das administracións o 22 de xullo e o 13 de xullo pasados, rexeitaron sumarse ao acordo, a pesar de que este recolle as súas demandas". A pesar diso, Xunta e deputacións "manteñen o ofrecemento para avanzar na negociación".
Con todo, os sindicatos representantes dos bombeiros replicaron con outro comunicado (sinado por UGT, CC.OO., CIG, Sibggal, CSIF e USO) no que denuncian sufrir "o menosprezo máis grande ao que se lles someteu desde hai 20 anos". Relatan que se convocou á parte traballadora a esta reunión, pero contestóuselles que ese protocolo ten que estar consensuado e que a desconvocatoria de folga non se vai a producir mentres non haxa avances na negociación do convenio colectivo.
Así, os sindicatos explican que se presentaron este mércores na Xunta, onde quedaron á espera de que lles chamen para participar na reunión, cuestion que non se produciu e para a súa "sorpresa" comezan a ver "unha a unha" a todas as autoridades convocadas marcharse. Tras iso, dirixíronse ao gabinete de Vicepresidencia do Goberno galego para pedir explicacións, ao que lles contestaron que non contaban con eles alí para o encontro.
"Desde a parte traballadora somos coñecedores de que a nota de prensa que enviou a Xunta de Galicia pondo de manifesto que os bombeiros non queremos adherirnos a esa firma ten a única pretensión de desacreditarnos diante da cidadanía e tapar a ineptitude da Administración para resolver este conflito e demostra a incapacidade de prestar o servizo que encomendaron", reproban os sindicatos. "Todo este protocolo que agora presentan non cambia en nada a situación dos parques nin dos bombeiros. Teñen a intención de negociar e de darnos algo que xa é o noso por lei, que non é outra cousa que a condición de laboral fixo e as condicións que xa deberiamos ter desde hai uns anos atrás e que nos estiveron negando", agregan.
No encontro participaron o vicepresidente primeiro da Xunta, Diego Calvo; os presidentes das deputacións de Ourense, Luís Menor, e Pontevedra, Luís López; así como os deputados José Ramón Rioboo e Pilar García en representación da Coruña e Lugo, respectivamente.
PROTOCOLO
Segundo informa a Xunta, o acordo selado fixa a vontade de traballar para aplicar a sentenza de 28 de xaneiro de 2022 ao persoal subrogado dos consorcios provinciais da Coruña, Lugo, Ourense e Pontevedra, coa condición de persoal indefinido fixo que tiñan no momento da subrogación con motivo do modelo de xestión.
Como primeiro paso, prevese a firma dun convenio colectivo en cada un dos consorcios no que se recollan as mellores condicións dos convenios que tiñan os traballadores coas empresas fornecedoras do servizo. "Búscase así que se manteña o persoal realícese cun procedemento coas garantías legais necesarias, tal e como xa acordara a Xunta coas deputacións provinciais e conforme aos criterios da sentenza", explica. O texto asinado recolle que ese convenio se formalizará o máis axiña posible e que terá unha vixencia dun ano.
A partir desta firma, as partes implicadas comprométense a iniciar o próximo setembro a negociación de novos convenios colectivos para homoxeneizar as condicións laborais do persoal dos catro consorcios e entrarían en vigor en outubro de 2024. En paralelo, comezarase a tramitación das respectivas Relacións de Postos de Traballo (RPT).
O Goberno galego indica que a prestación do servizo contraincendios é competencia municipal e conta co apoio económico da Xunta, que achega "máis do 50 % do custo do servizo no conxunto de Galicia". En 2018 formulouse a posibilidade do cambio de modelo de xestión para pasar de indirecta a directa nos 24 parques de bombeiros dos consorcios provinciais, unha decisión que foi apoiada polo Goberno galego coa condición de que non suporía un aumento do custo nin maiores achegas económicas da Administración autonómica.
