Verdegaia denuncia a fata de transparencia da Xunta para a xestión de residuos en Galicia
Así mesmo, avisan de que a Xunta imcumpriu a normativa da lei de ordenación do territorio da comunidade galega.
Por Europa Press / Redacción | Santiago de Compostela | 29/08/2023 | Actualizada ás 12:15
A asociación ecoloxista Verdegaia denunciou a "falta de transparencia e o incumprimento" da normativa por parte da Xunta no que respecta á xestión de residuos en Galicia.
Nun comunicado, sinala que a directora xeral de Calidade Ambiental, Sustentabilidade e Cambio Climático publicou o pasado 7 de agosto un anuncio no Diario Oficial de Galicia (DOG) informando de que o plan de xestión de residuos municipais de Galicia 2023-2030 estaba "dispoñible para o trámite de información pública". Con todo, engade, "ata o 18 deste mes non foi publicado".
Respecto diso, Verdegaia indica que este feito vai "en contra" da lei de ordenación do territorio da comunidade galega que, na súa opinión, establece "claramente" os pasos a seguir para a información pública dos plans de xestión de residuos, "incluíndo a súa publicación na sede electrónica da Xunta". "A falta de transparencia na xestión destes asuntos compromete a participación cidadá e dificulta a supervisión dos plans e políticas ambientais", argumenta Verdegaia.
Finalmente, segundo apunta, o plan foi publicado na web "con case 15 días de demora" e indicando un prazo de participación pública entre o 18 de agosto e o 1 de outubro, período durante o cal esta asociación anuncia que "ten previsto realizar suxestións de mellora".
