Unicef Galicia participa na reconstrución de escolas afectadas tras o paso do furacán Ian en Cuba

Unicef Comité Galicia, co apoio da Xunta de Galicia, apoiará a Cuba na reconstrución de nove centros educativos da provincia de Pinar del Río damnificados polo paso do furacán Ián o pasado setembro.

Segundo explican nun comunicado, concretamente, UNICEF Comité Galicia adquirirá e distribuirá subministracións para a reconstrución de teitos e da infraestrutura sanitaria de escolas en cinco municipios afectados, onde están matriculados 420 nenos e nenas con edadescomprendidas entre os 6 e os 11 anos.

Así mesmo, contribuirá a mellorar o acceso á auga potable, así como ao seu almacenamento, e promoverase o establecemento de condicións óptimas de hixiene nas comunidades alcanzadas polo furacán. A intervención beneficiará a ao redor de 2.200 persoas, entre as que se atopan familias, persoal docente e resto da comunidade educativa.

O Plan de Acción de Nacións Unidas do que forma parte UNICEF en resposta ao furacán Ián, propón accións para a recuperación nos 11 municipios da provincia de Pinar del Río, onde unhas 550 escolas resultaron afectadas e onde estudan preto de 140.000 nenas e nenos. Cunha poboación total de 11,3 millóns de persoas, Cuba é un país altamente vulnerable para os efectos do cambio climático, como a subida do nivel do mar, sufrindo de forma recorrente o impacto de furacáns, terremotos e secas.

O furacán Ian, que azoutou a rexión occidental do país a finais de setembro de 2022, provocou grandes danos en infraestruturas, vivendas e agricultura, deixando a preto dun millón de persoas en necesidade de axuda humanitaria. Ao redor de 3,2 millóns de persoas das provincias de Pinar del Río, Artemisa e A Habana, e o municipio especial de Isla de la Juventud, víronse gravemente afectadas.