Iris Romero, a Policía Local de Pontevedra que terá que pedir unha excedencia para exercer como árbitra de Primeira División
O pleno municipal Extraordinario convocado este luns 11 de setembro no Concello de Pontevedra ratificou que o traballo de funcionaria da Policía Local non é compatible cun contrato coa Federación de Fútbol, polo que terá que pedir unha excedencia.
Por Europa Press / Redacción | PONTEVEDRA | 11/09/2023 | Actualizada ás 15:45
O pleno municipal Extraordinario convocado este luns 11 de setembro no Concello de Pontevedra ratificou que o traballo de funcionaria da Policía Local non é compatible cun contrato coa Federación de Fútbol, polo que terá que pedir unha excedencia. Na sesión plenaria abordouse o caso de Iris Romero, xuíza de liña na Primeira División Feminina de fútbol, categoría á que ascendeu esta tempada.
O pleno confirmou a incompatibilidade laboral desta policía local para compaxinar o seu traballo coa súa carreira de árbitra asistente sobre a base de "os informes xurídicos". "Todos os que pedimos son contundentes e claros", sinalou a edil de Persoal, Eva Villaverde. "Coincidimos na nosa postura, tanto PP, PSOE como BNG, que nos gustaría votar a favor desta compatibilidade", dixo a concelleira nacionalista, "pero a lei de incompatibilidade non deixa lugar á discrecionalidade e non recoñece como excepción ningún suposto", xustificou.
ABSTENCIÓN DA OPOSICIÓN
A denegación oficial da incompatibilidade produciuse cos 9 votos a favor dos representantes do goberno local do BNG e as abstencións dos edís de PP e PSOE. O concelleiro do PSOE, Manuel Fariña, apuntou que "o problema está na RPT (Relación de Postos de Traballo), que liga o factor da incompatibilidade ao complemento específico", polo que o grupo municipal socialista pediu a modificación puntual da RPT entendendo que esta "nunca debe ser máis restritiva que a lei estatal e a lei galega de incompatibilidades".
Pola súa banda a concelleira do Partido Popular, Pepa Pardo, criticou que foron o BNG e o PSOE os que aprobaron en febreiro de 2022 nunha xunta de goberno extraordinaria e urxente esta RPT. Pardo dirixiuse á árbitra afectada para dicirlle "que non se renda", desculpándose porque co informe "contundente" da asesoría xurídica do Concello "non queda máis remedio que absterse e pedir perdón porque este concello non estivo á altura das circunstancias".
