Rueda presentará no debate de política xeral "novas propostas" en materia fiscal e servizos públicos

O presidente da Xunta, Alfonso Rueda, destacou que o debate sobre o estado da Autonomía que se prevé que acolla a Cámara galega no mes de outubro servirá para facer balance do feito e avanzar "novas propostas" en materia fiscal e servizos públicos. Así se pronunciou este sábado o máximo mandatario autonómico ao ser preguntado por esta cita política durante a súa participación nos actos organizados con motivo do centenario da Confraría de Pescadores de San Andrés de Portosín, en Porto do Son.

En declaracións aos medios, o presidente sostivo que o feito de que se celebre este debate é unha "mostra da normalidade coa que leva a vida política en Galicia", comunidade á que definiu como unha "illa de estabilidade" fronte á "inestabilidade" que se observa en España. "E fronte ás convulsións e ás leas internas que vemos nos partidos da oposición, o que facemos ou o que queremos facer é seguir gobernando", destacou Rueda.

Neste sentido, dixo que, no debate, fará un "balance de todo o feito estes anos" que, segundo indicou, "é moito" e, especialmente, do que quere "seguir facendo". "Estamos en plena elaboración dun orzamento que terá novas propostas en materia fiscal, en servizos públicos. En definitiva, para seguir facendo un pouco máis fácil a vida da xente", dixo o presidente da Xunta, que sinalou que "ao redor" se ve unha "inestabilidade" que non quere que "se contaxie a Galicia, en ningún caso".

Rueda presentará no debate de política xeral 'novas propostas' en materia fiscal e servizos públicos | Fonte: XUNTA