Investigan a un empresario da Pobra de Trives por unha vertedura e por non documentar a procedencia do embutido que vende

O Servizo de Protección da Natureza (Seprona) da Garda Civil tomou o mércores declaración en calidade de investigado a un empresario, veciño da Pobra de Trives, por unha vertedura sen control e por non acreditar a procedencia da carne que emprega para facer embutidos.

Segundo informa o Instituto Armado, este home é o responsable dunha empresa que realiza a súa actividade comercial no matadoiro municipal da Pobra, instalacións que carecen de autorización de verteduras da Confederación Hidrográfica Miño-Sil desde o ano 2010. De feito, tiña varios expedientes administrativos pendentes por este asunto.

Ademais, o home é responsable dunha compañía de embutidos, dedicada á elaboración, transformación e venda de carnes. A Garda Civil realizou varias investigacións e confirmou que non acreditaba documentalmente a procedencia do produto empregado. Por todo iso, está investigado como presunto autor dun delito contra os recursos naturais e o medio ambiente (pola vertedura) e doutro contra a saúde pública (por non documentar a orixe da carne). Leva o caso o Xulgado de Instrución número 1 da Pobra de Trives.

Carne sen etiquetar pola que investigan a un empresario da Pobra de Trives | Fonte: GARDA CIVIL