A lei de benestar animal de Galicia está desfasada alomenos seis anos, segundo denuncian animalistas
A Fundación Franz Weber instou á Xunta a desenvolver o regulamento da súa lei de benestar animal. A súa falta de actualización "provocou que non se puxeron en marcha os programas formativos obrigatorios para o persoal de tendas de animais ou outras medidas contempladas no texto lexislativo", advirten.
Por Europa Press / Redacción | SANTIAGO DE COMPOSTELA | 04/10/2023 | Actualizada ás 13:05
A Fundación Franz Weber instou á Xunta a desenvolver o regulamento da súa lei de benestar animal, que, segundo expón a organización, "non desenvolveu en seis anos". Nun comunicado, chama "á responsabilidade" por parte da Xunta de Galicia "tras meses de campaña contra a nova Lei de Protección Animal de carácter estatal, as supostas advertencias sobre maior número de abandonos ou a petición de fondos para as administracións galegas".
Críticos co novo marco estatal "por non ser o suficientemente ambicioso", lembran ao Executivo galego "que aplica a Lei autonómica de protección e benestar dos animais de compañía) sen desenvolver o seu regulamento en seis anos, recorrendo a partes dun decreto de 1998". "Isto provocou que non se puxeron en marcha os programas formativos obrigatorios para o persoal de tendas de animais ou outras medidas contempladas no texto lexislativo".
Ademais, sostén que as "queixas" da autonomía galega estarían xustificadas "se a propia Xunta se puxese as pilas co apoio aos concellos, algo que tampouco sucedeu". "Na convocatoria relativa a 2023 a Xunta destina 230.000 euros a entidades locais, unha media de 734 euros por municipio, mentres reclama ao Goberno central diñeiro para estas mesmas administracións".
