Galicia rexistra a segunda maior caída de facturación do sector servizos do Estado en agosto

O sector servizos de Galicia rexistrou unha caída da súa facturación do 1,8% en agosto en comparación co mesmo mes do ano anterior, o que supón a segunda baixada máis acusada entre autonomías, só superada por Madrid (-7,2%).

Este retroceso é un punto maior que a diminución media do 0,5% no país, segundo os datos publicados polo Instituto Nacional de Estatística (INE) este mércores. Baleares (+10,4%), A Rioxa (+9,7%) e Asturias (+7,3%) foron as que computaron maiores subidas en agosto. No que vai de ano, entre xaneiro e agosto, as vendas do sector servizos eleváronse un 5,6% en Galicia. Neste caso aumenta por encima da media española (3,7%).

No tocante ao emprego, creceu un 1% en Galicia no sector servizos en agosto. Supón o terceiro pola cola por comunidades, pois só é máis baixo en Cantabria (0,3%) e Estremadura (0,9%). A media estatal avanza un 1,8%. No outro extremo sobresae o 5,2% de Baleares.

DATOS ESTATAIS

En España, o sector servizos recortou a súa facturación un 0,5% o pasado mes de agosto respecto ao mesmo mes de 2022, retomando así os descensos despois de que en xullo se presentara un aumento interanual das vendas do 1,5%.