Aprobado o teito de gasto que a Xunta di que é "realista" e a oposición rexeita

O pleno do Parlamento de Galicia aprobou este mércores, cos votos a favor unicamente do PPdeG, o teito de gasto da Xunta para 2024, "realista e prudente" e que se sitúa en 13.257 millóns, como paso previo á tramitación do proxecto de orzamentos, que a oposición rexeitou durante as súas intervencións.

Na súa quenda de palabra, durante un breve pleno que se prolongou unha hora, o conselleiro de Facenda, Miguel Corgos, sinalou que o Goberno galego apurou os tempos pero "non podía esperar máis" polos datos de financiamento do Executivo central.

Así, lembrou os datos macroeconómicos das previsións actualizadas e reiterou que o teito de gasto permitirá unha capacidade de gasto un 5% superior á do orzamento vixente. Corgos pediu ao final do seu discurso que todos os grupos apoien este paso "para poder aprobar de forma inmediata o proxecto de orzamentos e poder seguir atendendo as necesidades de todos os galegos", aínda que BNG e PSdeG votaron en contra.

UN DISCURSO "CÍNICO"

O primeiro en falar foi o socialista Luís Álvarez, quen criticou o "carácter rutineiro" que ao seu xuízo dá a Xunta a este trámite. "Se queren crer que son os mellores, alá vostedes", soltou aos populares.

Neste sentido, censurou as baixadas de impostos e asegurou que é "cínico" que de forma paralela reclamen máis fondos ao Estado. Con isto reprobou "ir a unha negociación sobre un novo modelo de financiamento asegurando que se vai tan sobrado que se lles poden perdoar os impostos aos máis ricos".

"MESMAS RECEITAS FRACASADAS"

A continuación, a nacionalista Ana Pontón recriminou que "este Goberno leva meses convertido nun apéndice da estratexia do PP de Madrid". "Levamos meses cun goberno paralizado, primeiro ao servizo da estratexia electoral do PP de Madrid e despois porque estiveron coa calculadora electoral a ver cando lle conviña máis facer a convocatoria das galegas", afirmou.

Nesta liña, considerou que "o plan era que ía cabalgar sobre o inquilino da Moncloa, pero como non puido (Alfonso Rueda) leva semanas facendo promoción persoal como candidato" e "están a utilizar o cargo como presidente e os orzamentos son unha peza crave desa estratexia".