Concentración en Viana do Bolo para pedir que non se peche a mina de Penouta

Decenas de persoas concentráronse este martes na praza maior de Viana do Bolo para defender a continuidade do proxecto mineiro de Penouta. Baixo a lema 'Penouta Non se Pecha', pediron que se reverta a decisión do TSXG de suspender provisionalmente o permiso para a 'sección C' da mina de Penouta e insistiron no impacto económico e social que iso tería "de non reverterse esta situación".

Esta decisión de peche cautelar implica, segundo un comunicado remitido aos medios de comunicación en nome de "Viana do Bolo e a súa comarca", a paralización da actividade laboral de 129 familias e empresas auxiliares que na actualidade traballan na mina de Penouta.

"O 82% dos traballadores da mina son da provincia de Ourense, e deles, o 75% son da contorna máis inmediata da explotación mineira", sinala a nota de prensa. Os traballadores anunciaron que continuarán coas mobilizacións e emprazaron para unha nova concentración na Coruña, fronte á sede do TSXG.

Segundo o comunicado, "a compañía espera e confía en que o tribunal, unha vez avaliado os elementos esenciais ambientais e sociais e do impacto que tería a suspensión da actividade da empresa na contorna, reconsidere a súa decisión".

CC.OO.

A través doutro comunicado, a sección de industria de CC.OO. reclama que non se peche a mina e lamenta a decisión do TSXG "na súa liña de paralizar proxectos industriais necesarios para o futuro e o desenvolvemento social". "Deixa na rúa e sen solución de futuro", segundo advirte, a eses 129 traballadores "e algúns centos de indirectos", nunha comarca "economicamente moi deprimida".

Respecto diso, censura que "todo parte dunha denuncia, unha vez máis, dunha organización ecoloxista". En Penouta, segundo apunta, extráese tantalita, material que está presente nos teléfonos móbiles, e é así "a única mina de coltán de Europa".