O concello das Pontes está chamado á folga ante "a grave situación laboral, económica e social" do municipio
Será o 23 de novembro durante catro horas e demandaranse solucións "concretas" á situación que atravesa o concello tras o peche da central térmica e o ERE anunciado para Einsa Print.
Por Europa Press / Redacción | FERROL | 10/11/2023 | Actualizada ás 16:46
O sindicato CIG rexistrou este venres unha convocatoria de folga xeral para o próximo 23 de novembro no municipio das Pontes de García Rodríguez, para denunciar "a grave situación laboral, económica e social" que está a sufrir este concello da comarca do Eume. O responsable da central nacionalista nas Pontes, Alberte Amado, presentou este venres a folga, que será de catro horas (de 11.00 a 15.00 horas) e que irá acompañada dunha manifestación a partir das 12.00 horas polas rúas da vila pontina.
A CIG chama a participar na xornada a "todos os sectores da localidade, tanto no ámbito administrativo como no ámbito industrial" para demandar solucións "concretas" á situación que atravesa o municipio tras o peche da central térmica, que puxo fin a case medio século de actividade a comezos de outubro. Acompañado polo secretario xeral da CIG, Paulo Carril, e o responsable do sindicato en Ferrol, Manuel Grandal; Alberte Amado detallou que esta convocatoria de paro chega pola "falta de compromisos concretos" nas medidas e proxectos englobados nos plans de transición xusta.
A iso sumou a situación que atravesa "unha empresa emblemática" das Pontes como Einsa Print, "símbolo da reindustrialización despois do peche da mina" e para a que a dirección expuxo un ERE que afecta a 155 traballadores da planta que ten no municipio coruñés. Tras apuntar que a CIG trasladou a "outras centrais sindicais" a súa proposta de convocatoria de folga, apuntou que a CIG espera que "se poidan sumar" para realizar unha mobilización conxunta dado que "todas as reivindicacións" que se defenden son comúns.
Por outra banda, Amado tamén reclamou "o mantemento dos 1.400 megawatts da central térmica no momento de peche, que non pode desaparecer". Para iso, pide unha poxa para converter esta potencia nun "motor industrial de futuro con obrigacións reais, non só con decisións empresariais para os proxectos que se poidan instalar, senón con esa obrigación a través dese concurso". Por último, alertou que "os novos proxectos industriais que tiñan as garantías de subministración eléctrica, están en dúbida a día de hoxe" ante a ausencia de chan industrial, polo que instou ás administracións a actuar "á maior velocidade posible".
