Xogo de equilibrios no PSdeG

Os grandes perdedores deste cónclave son os seguidores de Ismael Rego, fiel escudeiro de Touriño durante anos e, agora, en horas moi baixas. Perdeu a dous dos seus membros, Natividad González Laso e Pablo López Vidal e mesmo veu reducido o papel da presidenta do Parlamento, Dolores Villarino, ó de mero vocal. Unha victoria do sector de Varela e Vázquez que o presidente galego non tivo ningún problema en dixerir a cambio doutras concesións.

Tamén quedou en terra de ninguén o sector de Louro, que aínda que se mantén no núcleo duro do partido, perde efectivos. Mantén a Meijón e Pose pero nunha posición incomoda, sen decantarse por dar o seu apoio a Touriño ou ó partido.

E aínda que algúns aseguran que Touriño xa non ten rivais, o certo é que botando contas, as cousas seguen como estaban, ou case. Tal e como avanzamos aquí, o PSdeG dotouse dunha estructura idéntica ao do PSOE, unha fórmula que o propio Touriño e Varela descartaron en varias ocasións e que se rescatou o sábado durante un encontro que mantiveron Touriño, Blanco e Varela para perfilar, definitivamente, a composición dos novos órganos socialistas. Deste xeito permitese a continuidade, sen que caia en contradicción coa nova estructura do PSOE, dos altos dirixentes do partido nas estructuras do Goberno galego, como é o caso de Varela, sen que estes perdan atribucións nin poder.

E, durante o cónclave, tamén se lanzou unha idea; Touriño pode adiantar as eleccións ó outono. Unha proposta que ten como finalidade meter medo a nacionalistas e populares, especialmente ós primeiros que aínda non celebraron a súa asamblea para elexir candidato, pero que ten poucos trazos de levarse a cabo, principalmente, polo retraso de certos proxectos de lei que Touriño prometeu que ía aprobar durante esta lexislatura.