Sabes que os galegos van gastar máis que o ano pasado e máis que a media do Estado este Nadal?

O gasto medio previsto polos galegos en época do Nadal sitúase en 602 euros, o que representa un 6% máis respecto ao ano anterior, cando foi de 566 euros, segundo o Zoom de Intención de gasto en Nadal do Observatorio Cetelem.

Segundo o estudo, realizado a partir de 1.000 enquisas en liña en todo o Estado, o desembolso previsto polos galegos é superior á media estatal, que se sitúa en 568 euros. Un 27% dos galegos enquisados asegura ter intención de realizar un maior desembolso que no nadal do ano pasado, mentres que o 42% manifesta que realizará o mesmo gasto e un 31% que destinará menos diñeiro.

De entre o 31% dos galegos que declaran ter intención de realizar un menor gasto, 9 de cada 10 afirman que é motivado polo impacto da inflación na súa economía doméstica, o que supón un aumento respecto das declaracións de 2022.

Entre as accións que máis realizarán para reducir o gasto en Nadal, a maioría comprará menos agasallos para familiares e amigos (80%). Séguelle un 65%, que reducirá ou descartará as reunións e saídas con amigos a bares ou restaurantes; e outro 62,5%, que comprará menos produtos de alimentación e bebidas, ou máis baratos, para as reunións familiares.

Os produtos con maior intención de compra por parte dos galegos para este nadal, segundo este estudo, son xoguetes (53%), moda (51%), e perfumes (47%).

Cetelem é especialista en crédito ao consumo, préstamos persoais e xestión de cartóns. Opera en España desde 1988, onde conta actualmente con máis de 1.500 empregados e 3,5 millóns de clientes.

Varias persoas con bolsas da compra nunha rúa | Fonte: María José López - Arquivo