O goberno local de Santiago, de BNG e CA, pacta os orzamentos co PSOE
Un acordo que presentarán e asinarán este venres.
Por Europa Press / Redacción | SANTIAGO DE COMPOSTELA | 28/12/2023 | Actualizada ás 20:50
O goberno local de Santiago de Compostela, que preside Goretti Sanmartín (BNG) en coalición coa Compostela Aberta de María Rozas, pactou os orzamentos co PSOE, un acordo que presentarán e asinarán este venres. Concretamente, a cita para a firma do pacto está convocada para as 10.00 horas no Salón Amarelo do Pazo de Raxoi.
Asinarán o acordo para os orzamentos municipais de 2024 a propia Goretti Sanmartín, por parte do BNG, María Rozas, por parte de Compostela Aberta, alcaldesa e tenente de alcaldesa, respectivamente, e Aitor Bouza, recentemente elixido responsable do PSOE local pero que non forma parte da corporación (aínda que si concorreu nas listas).
O borrador de orzamentos do Concello de Santiago presentado ascende a 141 millóns de euros e, na súa presentación, Goretti Sanmartín destacou que tiñan como obxectivo "iniciar un modelo de concello transformador, acorde coas demandas dos santiagueses", ademais dun "marcado carácter social".
A orientación fundamental destes orzamentos foi a de darlle protagonismo aos barrios e parroquias e avanzar nun concello "territorialmente cohesionado, con novas dotacións públicas e unha mellora na calidade de vida dos cidadáns". Así, as principais liñas de actuación céntranse nos servizos públicos, as políticas sociais e culturais, novos proxectos de transformación urbana e a mellora da sustentabilidade e a eficiencia.
O Concello tamén aposta por aumentar a contía do servizo de 'Axuda non fogar', que presenta un incremento en comparación co último aprobado do 43% nesta anualidade e que en 2025 chegará a ter uns orzamentos de 6,3 millóns de euros, fronte aos 3,6 de 2022, segundo explicou a alcaldesa.
Outro incremento en materia social é a incorporación de fondos para o programa 'Xantar na casa', para as bolsas de comedor escolar e a área de cooperación ao desenvolvemento, que aumenta nun 149%, ademais de para obras como o Centro de persoas sen fogar.
Aumentará tamén o investimento en Mocidade nun 92%, con 565.000 euros e os orzamentos para o emprego, que pasan de 725.000 euros a case 1,2 millóns, e o comercio local, con 170.000 máis que en 2022. Na área de mobilidade e transporte, supéranse os 9 millóns de euros para transporte público, fronte aos 6,8 do 2022.
Ademais, o borrador contemplou 2,5 millóns de euros para os servizos de centros socioculturais, obras de mellora e acondicionamento, que se incorporará a unha partida da rede de investimentos para a sede sociocultural. Respecto ao 'Pacto polo Rural', os orzamentos conteñen unha dotación económica de 4.375.147 euros, cunha porcentaxe superior ao 3%.
Estes 141 millóns de euros repartiranse en 121 millóns para gastos correntes, máis de 18 millóns para gastos de capital, onde están incluídas os investimentos e case un millón de euros en devolución de préstamo.
