Os centros galegos poderán abrir excepcións dentro da prohibición dos móbiles
Os alumnos poderán usar o móbil de modo "proporcionado e razoable" en situacións de necesidade "médicas ou doutra índole".
Por Europa Press / Redacción | SANTIAGO DE COMPOSTELA | 04/01/2024 | Actualizada ás 16:39
A Consellería de Cultura, Educación, FP e Universidades publicou este xoves a orde co novo protocolo para o uso dos móbiles nos centros escolares sostidos con fondos públicos, que terá plena vixencia a partir deste luns, 8 de xaneiro, coa volta ás clases tras o parón do Nadal.
Este texto, recollido por Europa Press, ten un "carácter básico", é dicir, que cada centro poderá adaptalo á súa realidade a través dos seus plans de convivencia e establecer as súas propias restricións e excepcións.
O principal punto deste protocolo, que vén actualizar a normativa en vigor desde 2015, establece a prohibición dos móbiles e outros dispositivos electrónicos como mecanismo de comunicación na "totalidade da xornada escolar". Isto inclúe os "períodos non lectivos": entradas e saídas, recreos, comedores e actividades complementarias e extraescolares.
Iso si, os centros poderán "establecer excepcionalmente normas para a correcta utilización" destas tecnoloxías como "ferramenta pedagóxica" e sempre "supervisada polo profesorado".
Ademais, os alumnos poderán usar o móbil de modo "proporcionado e razoable" en situacións de necesidade "médicas ou doutra índole", sempre cando estea xustificado polas circunstancias e sexa autorizado pola dirección ou, de non ser posible, polo profesorado.
O último punto establece o matiz de que o protocolo poderá non aplicarse en ensinos de Formación Profesional de grao superior, de réximes especiais --como escolas oficiais de idiomas-- e de adultos.
"MELLORA CONTINUA DA CONVIVENCIA"
Isto é o groso do contido do protocolo que ten unha extensión de catro páxinas e media e que figura como anexo dunha orde. Na súa exposición de motivos, enmarca as medidas na "mellora continua da convivencia escolar", unha liña "prioritaria" para a Consellería de Educación.
Neste contexto, a Xunta non obvia o proceso de transformación dixital das escolas e que o uso do móbil forma parte "do día a día", tamén dos menores.
Para ese efecto, o novo protocolo, que foi trasladado en semanas pasadas a directores, asociacións de pais e outros axentes implicados --con opinións algo diverxentes--, busca definir o que son as "boas prácticas educativas" no emprego da tecnoloxía.
Ademais, o texto ten en conta que, en base á normativa anterior, do ano 2015, había "numerosos centros" que xa tiñan nas súas normas de convivencia as súas propias restricións que se sumaban ás establecidas pola Consellería con resultados "valorados como positivos por toda a comunidade educativa".
Por isto mesmo, o novo protocolo vén aumentar o alcance da prohibición do uso dos móbiles para así equiparalo en todos os colexios e institutos sostidos con fondos públicos.
Serán os servizos de Inspección Educativa os encargados de prestar o asesoramento necesario aos centros e de supervisar a adaptación á normativa. En paralelo, a Xunta iniciará os trámites para modificar a normativa oportuna. A Consellería tamén se compromete a deseñar un plan de formación que acompañará ás familias no manexo responsable dos móbiles.
