Once persoas enfróntanse a entre catro e nove anos de cárcere por tráfico de drogas na provincia de Pontevedra
Por Europa Press / Redacción | PONTEVEDRA | 14/01/2024 | Actualizada ás 16:01
A sección segunda da Audiencia Provincial de Pontevedra celebrará o día 16 o xuízo contra once acusados de distribuír droga pola provincia, feitos polos que Fiscalía pide, por un delito contra a saúde pública, penas que van entre os nove anos e os catro anos e seis meses de cárcere. Entre os acusados, nunha causa que procede do Xulgado de Instrución número 3 de Cambados, hai españois, pero tamén persoas de orixe albanesa e portugués.
A súa imputación produciuse como resultado das investigacións realizadas polo Servizo de Vixilancia Aduaneira, dependente da Axencia Tributaria, e o grupo UDYCO Pontevedra do Corpo Nacional de Policía, así como a Garda Civil. Os procesados, segundo esta investigación, facían provisión de distintas partidas de estupefacientes, tanto cannabis e haxix como heroína, para a súa posterior distribución na provincia de Pontevedra.
Para iso tiñan plantacións de cannabis, en colaboración cun investigado xa falecido e en relación a uns feitos que se remontan aos anos entre 2016 e 2018. Fiscalía sostén que era "unha actividade sostida e entre todos estruturada con encomenda de tarefas particularizadas a cada un deles" para, entre outras cuestións, a explotación das plantacións de cannabis. Na investigación, tamén se lles incautaron outras sustancias estupefacientes.
